Atyraýlyq dárigerler náreste ólimi faktisin jabý úshin para bermek bolǵan

NUR-SULTAN. QazAqparat – Atyraýda perınataldy ortalyqtyń birneshe qyzmetkeri sybaılas jemqorlyqqa qatysty iske qatysy bar degen kúdikke ilinip otyr. Bul týraly elordada Sybaılas jemqorlyqqa qarsy is-qımyl agenttiginde ótken brıfıng barysynda agenttik tóraǵasynyń orynbasary Shyńǵys Qabdolla málim etti, dep habarlaıdy QazAqparat tilshisi.

«Atyraý oblystyq perınataldy ortalyqtyń birneshe laýazymdy qyzmetkeriniń sybaılas jemqorlyqqa qatysty tergelýine erekshe toqtalyp ótsem deımin. Atalǵan ortalyq basshysy óziniń baǵynyshtylaryna sot-medıtsınalyq saraptama ınstıtýty fılıalynyń basshylyǵyna 300 myń teńge para bergizýge ıtermelegen. Osylaısha, tergeý nusqasyna sáıkes, náresteniń ólimine qatysty dárigerdiń qateligi bolmady degen saraptama qorytyndysyn alý kózdelgen», - dedi Shyńǵys Qabdolla.

Sonymen birge, ol joǵary laýazymyn paıdalanyp, demeýshilikten kelgen 1,5 mln teńgeni óz paıdasyna jaratqan.

«Dárigerlerdiń biliktiligin arttyrý boıynsha sheteldik issapardyń qajettiligi úshin jeke kompanııadan aqsha suralǵan. Kompanııa dırektorynan alǵan qarajatty aýrýhana basshysy óz maqsatyna jaratyp, shetelde demalyp kelgen», - dedi Sh.Qabdolla.