Atyraýlyq baýkespe ury Oralda ustaldy
ORAL. QazAqparat - Oral qalalyq ishki ister basqarmasynyń qyzmetkerleri páterlerge túsip, ábden dánikken 41 jasar uryny qolǵa túsirdi, dep habarlaıdy «QazAqparat» tilshisi.
BQO ishki ister departamentiniń baspasóz qyzmetinen túsken málimetke qaraǵanda, kúdiktige qatysty QR QK 188-baby 2-bóligine (urlyq) sáıkes qylmystyq is qozǵalyp, bes birdeı derek boıynsha sotqa deıingi tergeý amaldary júrgizilýde. Ury páterlerge kiltti sáıkestendirip kirip, zergerlik buıymdar men aqshany úptep ketip otyrǵan. Mysaly, qazan aıynda ol Ların kóshesindegi bir páterge kirip, odan bıjýterııalyq buıymdar men 55 myń teńgeni urlaǵan. Qazanda Zachagan kentindegi taǵy bir páterden altyn, kúmis buıymdaryn jáne 30 myń teńgeni jymqyryp ketken.
Kúdikti Atyraý oblysynyń týmasy bolyp shyqty. Onyń osyndaı basqa da qylmystarǵa qatystylyǵy tekserilýde.
