Atyraýlyq bapker men shákirti qoıan-qoltyq urystan álem kýboginde «altyn» ıelendi
Óńirlik kommýnıkatsııalar qyzmetiniń aqparatyna súıensek, álemdik týrnır 7-9 sáýirde Máskeýde ótti.
«Reseı Federatsııasynyń astanasynda eresekter arasynda «Dostyq kýbogy – 2023» atalatyn qoıan-qoltyq urystan álem kýbogy ótti. Bul doda aıasynda alǵash ret jastar men jasóspirimder arasynda ózin-ózi qorǵaý boıynsha álem birinshiligi jalaýyn jelbiretti. Oǵan álem elderinen 21 komanda qatysyp, 300-ge jýyq sportshy baq synady. Onyń ishinde atyraýlyq sportshylar da bar. Olar 3 altyn, 1 kúmis, 4 qola medal jeńip aldy», - delingen habarlamada.
Máselen, jasópirimder arasynda álem birinshiliginen 90 keli salmaqta Nurbergen Myrzaken men 70 keli salmaqta Dıana Jumaǵazıeva altyn medal jeńip aldy. Al 75 keli salmaqta Dıana Jandarbaı «kúmiske» qol jetkizse, 70 keli salmaqta Álı Ótegenov qola medal enshilegen.
Nurbergen Myrzaken álem kýboginde de synǵa tústi. Ol 88 salmaqta álem kýboginiń ıegeri atanyp otyr. Osy salmaqta baq synaǵan taǵy bir atyraýlyq Bek Nasıhatov qola medal ıelendi. 67 keli salmaqtaǵy Álı Ótegenovke de «qola» buıyrdy.
Al atyraýlyq bapker Haıdar Esenǵalıev 38-49 jastaǵy eresekter arasynda myqty ekenin tanytty. Bapker 95 keliden joǵary salmaqta altyn medal enshilep, álem kýbogin jeńip aldy.
Eske salaıyq, budan buryn Atyraýlyq sportshy gir kóterýden álem chempıony atanǵanyn jazǵan edik.
Foto: Atyraý Óńirlik kommýnıkatsııalar qyzmetinen