Atyraýlyq bapker álem chempıonatynda júldeger atandy
ATYRAÝ. QazAqparat – Atyraýlyq bapker Haıdar Esenǵalıev álem chempıonatynyń júldegeri atandy, dep habarlaıdy QazAqparat.
Oblystyq sport jáne dene shynyqtyrý basqarmasy baspasóz qyzmetiniń aqparatyna súıensek, 4-8 maýsymda Tashkent qalasynda qoıan-qoltyq urystan álem chempıonaty ótken.
Álem chempıonatyna 38 elden 240 sportshy qatysty.
Atyraýlyq sportshy Haıdar Esenǵalıev ózin-ózi qorǵaý boıynsha aýyr salmaqta baq synady.
«Ol Qyrǵyz Respýblıkasynyń qos sportshysy men Rýmynııanyń ókilderin utty. Al, jartylaı fınalda Ózbekstan sportshysyna ese jiberdi. Sóıtip, ol álem chempıonatynyń qola júldesin ıelendi» dep habarlady basqarmanyń baspasóz qyzmeti.
Haıdar Esenǵalıev – qoıan-qoltyq urystan Atyraý oblysynyń aǵa jattyqtyrýshysy. Álem jáne Azııa chempıondaryn daıyndap shyǵarǵan.
Eske sala ketelik, budan buryn atyraýlyq paradzıýdoshy Gran Prı týrnıriniń qola júldesin ıelengenin jazǵan bolatynbyz.
