Atyraýlyq balǵyn qyz Túrkııadaǵy sulýlyq baıqaýyna qatysady
ATYRAÝ. QazAqparat - «Kishkentaı hanshaıym men álem hanzadasy» halyqaralyq baıqaýyna Qazaqstan atynan Altynaı Ramazanova qatysady, dep habarlaıdy QazAqparat tilshisi.
«Atyraýdyń kishkentaı turǵyny Altynaı Ramazanova «Mını hanzada jáne Azııa hanshaıymy» respýblıkalyq baıqaýynda gran-prı utyp alǵan bolatyn. Osylaısha, ol «Kishkentaı hanshaıym men álem hanzadasy» halyqaralyq baıqaýynda Qazaqstan namysyn qorǵamaq. Altynaı nebári 4 jasynda «Atyraýdyń kishkentaı hanshaıymy - 2018» baıqaýynda jeńimpaz atanǵan edi. «Mını hanzada jáne Azııa hanshaıymy» syndy respýblıkalyq deńgeıdegi konkýrsqa alǵash ret qatysqan bolatyn. Sulýlyq baıqaýyna Qazaqstannyń túkpir-túkpirinen 30 bala jınaldy. Altynaı qazylar alqasyna óziniń súıkimdiligimen jáne balalyq tabıǵı bolmysymen áser ete aldy», - dep málim etti ákimdiktiń baspasóz qyzmetinen.
Altynaı Ramazanovanyń ata-anasy onlaın-jýrnalmen kelisimshartqa otyrdy. Atyraýlyq balǵynnyń beınesi onyń muqabasyna ornalastyrylatyn bolady.
Halyqaralyq baıqaý mamyr aıynda Túrkııanyń Bodrým qalasynda ótedi.
Avtory: Andreı Sokolov
