Atyraýlyq BAQ ókilderi Jaıyqtyń jaǵalaýyn qoqystan tazartty
ATYRAÝ. QazAqparat - «Qazaqstan» respýblıkalyq teleradıokorporatsııasy» AQ Atyraý oblystyq fılıaly men «Atyraý-Aqparat» medıa-holdınginiń ujymy birlesip, respýblıkalyq #Birge #TazaQazaqstan aktsııasy aıasynda Jaıyq ózeni jaǵasyn qoqystan tazartýǵa atsalysty, dep habarlaıdy QazAqparat.
«Atyraý» teleradıokompanııasynyń dırektory Qanat Áýesbaı, «Atyraý-Aqparat» JShS dırektorynyń birinshi orynbasary Ysqaq Egemberdi bastaǵan jýrnalıst qaýymy men «Alash mádenıeti» qoǵamdyq qorynyń eriktileri Jaıyq ózeniniń boıynda turmystyq qaldyqtan tazalap, sońyn fleshmobpen aıaqtady.
«Balalarymyzdyń bolashaǵy, olardyń deniniń saýlyǵy qorshaǵan ortamyzǵa, ekologııamyzǵa tikeleı baılanysty. Taza jerde turyp, taza aýa jutsaq, densaýlyǵymyz da jaqsy bolary sózsiz. Jaıyq ózeni jaǵasynan turmystyq qaldyqty kóp kórdik. Ásirese, sý, shyrynnan bosaǵan plastıkalyq qutylar, shyny ydystar beı-bereket shashylyp jatyr. Bul plastık qutylar jer betinde birneshe on jyldap jata beredi. Ózdiginen joıylmaıdy. Kerisinshe aýa-raıynyń áserinen túrli zııady zat bóledi. Endeshe tabıǵatty taza ustaıyq degim keledi», - deıdi «Atyraý» teleradıokompanııasynyń dırektory Qanat Áýesbaı.
«Atyraý-Aqparat» JShS dırektorynyń birinshi orynbasary Ysqaq Egemberdi bul aktsııa bir taraptan jýrnalısterdiń aýyzbirligin nyǵaıtsa, ekinshi jaǵynan óskeleń urpaqtyń boıyndaǵy týǵan jerge degen súıispenshiligin arttyrýdaǵy qosar úlesin aıtty.
Jýrnalıster kóbine mundaı ekologııalyq aktsııalardy BAQ betinde nasıhattaýshy ǵana. Al, bul joly oblystaǵy eki birdeı iri medıa ujymy kil jastardan quralǵan eriktilermen birlesip, ózen boıyn qoqystan tazartty. 2 saǵattyń ishinde shamamen 200 kelideı qaldyq jınaldy.
Oblystyń BAQ ókilderi qoldaǵan ekologııalyq is-shara 27 shildede Atyraýda jalǵasatyn bolady. #Birge #TazaQazaqstan aktsııasy aıasynda Atyraýdaǵy Jaıyq ózeni jáne qala aýmaǵyndaǵy barlyq sý toǵanynyń jaǵalaýy qoqys qaldyǵynan tazartýǵa barlyq mekeme, kásiporyn, ónerkásip ujymdary shaqyryldy.
Aıta keteıik, Memleket basshysy Ekologııa, geologııa jáne tabıǵı resýrstar mınıstri Maǵzum Myrzaǵalıevti qabyldap, halyqtyń ekologııalyq mádenıettiligin arttyrýǵa jáne qorshaǵan ortany qorǵaý jumystaryna eriktilerdi tartý jóninde tapsyrma bergen edi.
Artynsha mınıstrliktiń bastamasymen #Birge #TazaQazaqstan ekologııalyq aktsııasy jarııalanyp, atalmysh aktsııa aıasyndaǵy sharalarǵa Úkimet basshysy Asqar Mamın de qatysqan bolatyn.
