Atyraýlyq baǵban jylyjaıda injirdiń alǵashqy ónimin aldy
ATYRAÝ. QazAqparat –Atyraý oblysynda sharýager jylyjaıda injirdiń alǵashqy ónimin aldy, dep habarlaıdy QazAqparat.
Mahambet aýdanyndaǵy «Atyraý ónimderi» sharýa qojalyǵynyń 20 jylyjaıy bar. Sharýa qojalyǵyn basqaratyn Vladımır Rozmetov baqsha ónimderiniń túr-túrin ósiredi.
«Birneshe jyl buryn 20 jylyjaıda lımon ósire bastaǵan edik. Qazir lımonnan ónim alyp otyrmyz. Sodan soń tájirıbe jasaý maqsatynda injirdi ósirýdi qolǵa aldyq. Іnjir de bizdiń óńirge jersindi. Jaqynda alǵashqy ónimin jınadyq. Ózbekstandyq ǵalymdardyń keńesine súıensek, injirdi tek jylyjaıda ǵana emes, ashyq aspan astyndaǵy alqapta da ósirýge bolady. Biraq, qysqy maýsymda ony da júzim sııaqty jaýyp qoıý kerek», - deıdi Vladımır Rozmetov.
Onyń aıtýynsha, Atyraý sekildi jartylaı shóleıtti aımaq úshin tańsyq sanalǵan injirden 50 keliden astam ónim alýdyń múmkindigi bar. Osyny eskergen sharýager aldaǵy jyly ony 1 gektar alqapta ósirýdi kózdep otyr.
Budan buryn habarlaǵanymyzdaı, Atyraý oblysynda 222 adam bıznes bastaý úshin nesıe men granttar aldy.
