Atyraýlyq azamat óz úıinen retro-murajaı ashty
Óńirlik kommýnıkatsııalar qyzmetiniń málimetinshe, shaǵyn murajaı bir bólmede ornalasqan jáne onda ár ýaqyttaǵy jádigerler jınaqtalǵan.
Ǵalymjan Muqashev uzaq jyldar esepshi bolyp eńbek etken, qazir zeınet demalysynda. Sırek kezdesetin eski zattardy jınaý – onyń hobbıi. Shaǵyn murajaı ashýdy kópten beri oılap júrgen. Alǵashqy eksponaty anasynyń shpındeli bolsa, qazirdiń ózinde 100-den astam jádiger bar.
Shaǵyn murajaıǵa kelýshilerdi, ásirese ótken ǵasyrdyń 50-70 jyldaryndaǵy zattar qyzyqtyrady. Biraq odan da kóne dúnıeler jeterlik, mysaly, janýarlardyń súıekterinen jasalǵan kóne shpındel.
«Munda ulttyq valıýtanyń alǵashqy úlgileri – teńge, ótken ǵasyrdyń ortasynda shyǵarylǵan teledıdarlar men radıolar, eski saǵattar, fotoapparattar, mýzykalyq aspaptar jáne t.b. kórýge bolady. Barlyǵy burynǵy qalpynda saqtalǵan. Murajaı ıesiniń ózi odan paıda tabýdy kózdemeıdi», - dep jazdy vedomstvodan.
«Menen keıin urpaqqa osynyń bári meniń muram retinde qalǵanyn qalaımyn. Sol kezdegi oqıǵalar arqyly alys-jaqyn ótkendi tanyp-bilý adamǵa ári qyzyq, ári paıdaly dep oılaımyn«, - deıdi Ǵalymjan Muqashevtyń ózi.
Endi ol kelýshilerdi qýantý úshin murajaıdy keńeıtip, jádigerler sanyn kóbeıtýdi oılap otyr.
