Atyraýlyq azamat áleýmettik jeli arqyly Aýǵanstannyń terrorıstik uıymyna enip, ýaǵyz júrgizgen
ASTANA. QazAqparat - 2013 jyly Qazaqstanda terrorızmge qatysty 65 qylmys jasalsa, 2014 jyly 52 qylmys tirkelip otyr. Búgin Parlament Senatynyń jalpy otyrysynda QR Bas prokýrorynyń orynbasary Jaqyp Asanov osylaı málim etti.
Eske sala keteıik, Senat otyrysynda «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.
Prokýratýra ókiliniń aıtýynsha, aǵymdaǵy jyly ekstremıstik jáne terrorıstik qylmys jasaǵany úshin Qazaqstannyń 29 azamaty sottalǵan. «Atyraýda bir azamat áleýmettik jeliler arqyly Aýǵanstannyń terrorıstik uıymdaryna kirip, jurtty sodyr bolýǵa shaqyrǵan. Bul qylmysy úshin ol 8 jylǵa bas bostandyǵynan aıyryldy. Sonymen qatar, sheteldik terrorıstik uıymy bizdiń bir azamatymyzdy arnaıy daıyndyqtan ótkizip, Qazaqstanǵa lańkestik qarýly toptar qurýǵa attandyrǵan. Bir aı buryn ol Qyrǵyzstanda ustalyp, elimizge qaıtaryldy. Qazir onyń ústinen qylmystyq is qozǵalyp, tergelýde», - deıdi J. Asanov.
Onyń aıtýynsha, prokýratýra aryzdarynyń negizinde myńnan astam ınternet jáne baspa materıaldary ekstremıstik dep tanylyp, olardyń taralymy toqtatyldy.
Al 2014 jyldan beri elimizde terrorıstik dep 15 uıym, ekstremıstik dep 6 uıym tanylyp, respýblıkamyzda olardyń qyzmetine tyıym salynǵan.
