Atyraýlyq Aıgerim Ahmetova «Sot júıesiniń úzdik aýdarmashysy» atandy

ASTANA. QazAqparat - Búgin Atyraý oblystyq sotynda Atyraý oblysy boıynsha Sottar ákimshisiniń Taldaý jáne josparlaý bóliminiń mamany Aıgerim Ahmetovany «Sot júıesiniń úzdik aýdarmashysy» respýblıkalyq konkýrsyndaǵy jeńisimen quttyqtaýǵa arnalǵan saltanatty jıyn ótti.

Aıta ketý kerek, respýblıkalyq konkýrs Joǵarǵy Sotta uıymdastyrylyp, úzdikter ataǵy úshin ár aýmaqtan kelgen 25 qatysýshy baq synady. Atyraýdan Aıgerim Ahmetova qatysty, dep habarlaıdy atr.sud.kz . Úsh týrdyń qorytyndysy boıynsha - sot qujaty men qyzmettik qujattamalardy aýdarý, sonymen qatar sot protsesi dıalogyn aýyzsha (sınhrondy) aýdarý boıynsha, qazylar alqasy «Bas júlde» ıegeri retinde Áıgerim Ahmetovany anyqtady. Sonymen qatar, konkýrs laýreatyna aqshalaı syılyq tabystaldy.

Atyraý oblystyq sotynyń tóraǵasy Marǵulan Bekturǵanov jas mamannyń kásibı biliktiligin aıta kele, onyń qyzmettik qadamyna  sáttilikter tiledi. Al basqalardy odan úlgi alyp, budan da joǵary jetistikterge jetýge shaqyrdy.

Eske sala keteıik, bul konkýrs Elbasynyń «Bolashaqqa baǵdar: rýhanı jańǵyrý» maqalasynda qoıylǵan tapsyrmalardy júzege  asyrý sheńberinde ótkizildi. Maqsat - memlekettik tilde sot isin jáne protsessýaldyq qujattardy jasaqtaı biletin, aýyzsha aýdarmany meńgergen kásibı sot aýdarmashylary korpýsyn qalyptastyrý.