Atyraýlyq aýyldastaryn eki ese arzan baǵamen tasymaldap júr
ATYRAÝ. QazAqparat - Atyraýlyq kásipker Sábıt Smaǵulov aýyldastaryn jeńildetilgen tarıfpen tasymaldaıdy, dep habarlaıdy QazAqparat tilshisi.
Kásipker Sábıt Smaǵulov 90-jyldardan beri jolaýshylardy tasymaldaýmen aınalysady. Osy ýaqyt aralyǵynda birneshe kólikti aıyrbastap úlgergen. Alaıda, ol osy ýaqyt ishinde tasymaldaý qunyn kótermeý degen ustanymynan tanǵan emes. Qazirgi kezde Sábıttiń jolaýshylardan alatyn jol quny ózgelerge qaraǵanda áldeqaıda tómen.
«Jolaýshylardy tasymaldaý meniń turaqty tabys kózim. Bul kóp te emes, biraq turaqty. Aýyldastarymnan artyq aqsha talap ete almaımyn. Olardyń shamasy keletin somaǵa jetkizgim keledi. Buryndary jeńil avtokóligim bolǵan, qazir «Bıznes-Keńesshi» jobasy arqyly jeńildetilgen shartpen mıkroavtobýs aldym. Tasymaldaýdaǵy tarıfti saqtaı otyryp shyǵyndy óteı alamyn degen oıdamyn», - deıdi S.Smaǵulov.
Atyraý oblysy kásipkerler palatasy aýdandyq fılıalynyń keńes berýshi mamandary byltyr kásipkerge «Bıznes Keńesshi» kýrsyna qatysýǵa usynys bildirgen. Sol arqyly bilim alǵandar úshin jeńildetilgen nesıe beriletinin de aıtqan. Sábıt Smaǵulov oqý aıaqtalysymen qajetti qujattardy jınap, «Aýyl sharýashylyǵyn qarjylaı qoldaý qory» arqyly jyldyq mólsherlemesi 6%-ben 3,5 mln teńge nesıe alǵan. Osy qarjyǵy «Mersedes Sprinter» mıkroavtobýsyn satyp alǵan.
Aıta ketelik, búginde kásipker «Mııaly aýyly Saǵyz aýyly» baǵyty boıynsha jolaýshy tasymaldaýmen aınalysady. Ara qashyqtyǵy 100 shaqyrymnan asady. Eger basqa tasymaldaýshylarda bir baǵyttaǵy jolaqysy 1500 teńge bolsa, al Smaǵulov aýyldastaryn 1000 teńge, qaıtar jolyn 500 teńgege jetkizedi.
