Atyraýlyq Asylbek Bekimov júzdegen jandy tilsiz jaýdan aman alyp qalǵan
Búgingi áńgimemiz óz mamandyǵyn jańylmaı taýyp, sol jolda eńbektenip júrgen azamat Asylbek Bólegenuly týraly bolmaq. Ol 1985 jyly 27 sáýirde Atyraý oblysy Mahambet aýdany Aqjaıyq aýylynda dúnıege kelgen. Otan aldyndaǵy boryshyn ótep kelgen Asylbek Bólegenuly ary qaraı eńbek jolyn osy otanǵa qyzmet etýge arnaımyn dep sheshti. Ol 12 jyl boıy órt sóndirý salasynda talmastan eńbek etip keledi.
Eńbek jolyn 2007 jyly Tótenshe jaǵdaılar departamentiniń «Órt sóndirý jáne avarııalyq qutqarý jumystary qyzmeti» memlekttik mekemesiniń Atyraý qalasy №1 mamandandyrylǵan órt sóndirý bólimshesinde órt sóndirýshi qyzmetinen bastaǵan. Óziniń eptiligimen, eńbekqorlyǵymen erekshe kózge túsip, 2011 jyly №4 órt sóndirý bólimine bólimshe komandıri bolyp taǵaıyndaldy. Ol Atyraý qalasynda bolǵan irili-usaqty órtterdi aýyzdyqtaǵan. Tilsiz jaýmen kúreste asqan eptilik, shapshańdyq, qyraǵylyq qajet. Órt kezinde otqa oranǵan ǵımaratqa kirip, ondaǵy adamdardy syrtqa shyǵarý kerek.
«Dál osy sátte óz ómirim emes, sondaǵy zardap shegýshi men komandamnyn amandyǵy birinshi orynda turady. Sondaı úlken órttiń biri 2009 jyly 31 qańtar tańǵy saǵat 5 shamasynda Atyraý qalasynyń oblystyq aýyrýhanasynda boldy. Ǵımarattan 250 adamdy shyǵardyq. Sol sátte aýyr haldegi jáne tósekke tańylǵan naýqastardy órtten tereze arqyly arqanmen 3-qabattan shyǵardyq. Jalpy aýrýhanadan aýyr haldegi 31 naýqas, odan bólek 201 naýqas pen medıtsına qyzmetkerlerin qutqardyq», - deıdi Asylbek Bólegenuly.
Sondaı-aq, 2018 jyldyń maýsym aıynda 9 qabatty «Aqjaıyq» qonaq úıinde bolǵan iri órtte eki adamdy apattyq saty boıynsha qutqaryp shyǵarǵan jáne J.Moldaǵalıev kóshesinde ornalasqan 5 qabatty №30 úıdiń 3-4 shi qabattarynan 11 adamdy avtosaty jáne dáliz arqyly qutqaryp, dalaǵa shyǵarǵan. Bul - naǵyz batyldyq.
Asylbek Bólegenuly atqarǵan adal qyzmetine oraı birneshe ret marapattalǵan. Tótenshe jaǵdaı júıesin damytýǵa qosqan úlesi úshin keýde belgisimen, III dárejeli «Órtke qarsy qyzmet organdaryndaǵy minsiz qyzmeti úshin» tóbelgimen, «Órtte kórsetken qaısarlyǵy úshin» tósbelgisimen jáne basqa da kóptegen alǵys hattarmen marapattalǵan.
Órt sóndirý kezinde laýlap janyp jatqan ǵımaratqa kirgendegi sezim múlde basqa. Alda ne kútip turǵanyn bilmeısin. Dál sol sátte tek óz isiniń maıtalmany ǵana mundaı táýekelge barady. Osyndaı erlik kórsetip, óz ómirin halqyna arnaǵan erjúrek erlerimiz barlyq maqtaýǵa laıyq.
Asylbek Bólegenuly - qazirgi tańda aıaýly jar, ardaqty áke, otbasynyń tiregi, sonymen qatar tamasha maman, adal dos. Úsh uldyń maqtanyshy, asqar taýy. Óziniń osy eńbek jolynda jas urpaqqa úlgi bola bilgen. Tilsiz jaýmen kúreste komandasyna durys baǵdar berip,árdaıym aldyńǵy sapta júredi. Jumystastarynyń arasynda óziniń sabyrly, salmaqty minezimen izin jalǵap kele jatqan ini-baýyrlaryna úlgi.
