Atyraýlyq arheologtar Qarabaýdaǵy qorǵandardan qundy jádigerler tapty
ATYRAÝ. QazAqparat - Atyraýlyq tarıhshy-ǵalymdar arheologııalyq ekspedıtsııa kezinde «Qarabaý-3», «Qarabaý-4» obalarynan jerlengen adam múrdelerin tapqan, dep habarlaıdy QazAqparat tilshisi.
Sonymen qatar atalmysh aımaqtan janýarlardyń súıekteri, aına synyqtary, monshaq, qysh qumyralar, áshekeı buıymdar tabyldy.
H.Dosmuhamedov atyndaǵy Atyraý memlekettik ýnıversıtetiniń gýmanıtarlyq ǵylymdar jáne óner fakýltetiniń tarıhshy-ǵalymdary Qarabaý óńirine ekinshi jyl barýy. Bul arheologııalyq ekspedıtsııanyń negizgi maqsaty - Elbasynyń «Bolashaqqa baǵdar: rýhanı jańǵyrý» baǵdarlamasy aıasynda elimizdiń ótken tarıhyn tarazylap, shejiresin jınaqtap, kóne jádigerlerimizdi búgingi urpaqqa amanattaý.
Sarmat taıpalary búgingi Atyraý óńirin b.z.b. VІІІ-V ǵasyrlarda mekendegeni tarıhtan belgili.
Ásirese, «Qarabaý-4» obasynyń kúnbatys jaǵynan bıiktigi 4-5 metr, eni 26 metr bolatyn ǵıbadathananyń tabylýy kóp zertteýdi qajet etedi. Al, bul obanyń aınalasynda áli 200-den astam shaǵyn obalar bar.
«Bul jerde mekendegen sarmat taıpalarynyń kúnge tabyný dástúri bolǵan. Eger dál osy jerdi aeroǵaryshtan sýretke túsiretin bolsa, ortasynda kún, aınala tabynǵan adamdar tobynyń sýreti aıqyn kórinedi»,-deıdi tarıh ǵylymdarynyń doktory, professor Aqqalı Ahmet.
