Atyraýlyq ana ıt talaǵan sábıin aýrýhanaǵa jetkizgen polıtseıge alǵys aıtty
Oqıǵa 2020 jylǵy 18 qarashada bolǵan. Sol kúni saǵat 16:51-de «102» pýltine «Juldyz-2» shaǵyn aýdanynyń turǵyny kishkentaı balany ıt talap ketkenin habarlaǵan. Oqıǵa ornyna jedel jetken polıtsııa qyzmetkerleri eki jasar balanyń basy men qoly jaralanǵanyn anyqtady.
Oblystyq balalar aýrýhanasynyń dáriger-travmatology Jaqsylyq Maǵzomovtyń aıtýynsha, sábıge birden alǵashqy medıtsınalyq kómek kórsetilgen.
«Adam ómiriniń jalǵasy – baladan artyq baılyq bar ma? Tún uıqysyn tórt bóletin ana retinde men de baýyr etim – balalarymnyń aman-esen óskenin qalaımyn. Bir jarym jyl buryn eki jasar balamdy qabaǵan ıt talap, ólimshi etkeni áli kúnge esimnen keter emes. Sol sátte janymdy qoıarǵa jer tappadym. Atyraý qalasynyń «Juldyz-2» shaǵyn aýdanyndaǵy úıimizge jedel járdem brıgadasyn shaqyrdyq. Oqıǵa bolǵan jerge polıtsııa qyzmetkerleri jedel jetti. Ýchaskelik polıtsııa ınspektory Qanat Ispýsınov jedel járdemniń kelýin kútpeı, jaraqaty aýyr balamdy kóligimen oblystyq balalar aýrýhanasyna jetkizdi. Polıtsııa ınspektory osylaı jedel áreket etip, jaraqat alǵan balamnyń aman qalýyna qol ushyn sozdy», - deıdi Áıgerim Aıynǵazıeva.
«Qazir buralqy ıt kóbeıdi. Osyǵan baılanysty jergilikti bılik ókilderi qańǵybas ıtten tónetin qaýiptiń aldyn alady dep senemin. Al, balamnyń aman qalýyna qol ushyn sozǵan polıtsııa ınspektoryna analyq alǵysymdy bildirýdi jón sanadym. Qoǵamdyq tártip pen turǵyndar qaýipsizdigin qamtamasyz etýdegi eńbegine jemis tileımin. Qınalǵan jannyń qorǵaýshysy bola bersin!», - deıdi Áıgerim Aıynǵazıeva.
Eske salaıyq, buǵan deıin Atyraý polıtseıleri tún ortasynda kópirden sekirmek bolǵan boıjetkendi qutqarǵanǵanyn jazǵan edik.
