Atyraýlyq alyp jigit elimizdiń rekordtar kitabyna enedi

ATYRAÝ. QazAqparat – Atyraýlyq alyp jigit Parasat Nurǵalıevtiń boıy uzyn, al aıaǵynyń ólshemi – 56 sm. Endi bul ólshemder elimizdiń rekordtar kitabyna tirkeledi, dep habarlaıdy QazAqparat tilshisi.

Bul týraly búgin, 20 sáýirde Qazaqstan rekordtar kitabynyń resmı ókili Qýandyq Qudaıbergenov málim etti.

Ol «Tańsholpan» baǵdarlamasynyń stýdııasynda alyp jigittiń boıyn ólshedi. Kórsetkish – 218,5 sm.

«Parasat Nurǵalıev Qazaqstan rekordtar kitabyna «Elmizdegi eń alyp adam» retinde enedi. Bir ereksheligi, onyń aıaǵynyń ólshemi bolyp otyr. Qazir aıaǵynyń ólshemi – 56 sm. Bul da rekordttar kitabyna tirkeledi», -dep málim etti Qýandyq Qudaıbergenov.

Qazir eń alyp jigit – Parasat Nurǵalıev Inder aýdanynyń Qurylys aýylynda anasymen birge turady.

Turaqty jumysy joq. Qurylys salasynda ártúrli jumys isteıdi.

Bos ýaqytynda Jaıyq ózeninen balyq aýlaǵandy unatady.

«Anashymnyń aıtýynsha, men ómirge kelgende, salmaǵymda da, boıymda da erekshelik baıqalmapty. Aǵalarym men apaıym da orta boıly, men sııaqty emes. Alaıda, ájem iri súıekti bolǵan eken. Ákem de uzyn boıly, keń ıyqty, iri saýsaqty bolypty», - deıdi Parasat Nurǵalıev.

Onyń aıtýynsha, boıy 6-synypta oqyp júrgende óse bastaǵan. Kıimderi qysqaryp, aıaǵynyń ólshemi úlkeıgen.

Al, 9-10-synyptarda 50-ólshemdi aıaqkıim tabý qıynǵa soqqan. 2014 jyly mektepti bitirgende, salmaǵy 120 kelige jetip, boıy 2 metr bolǵan.

«Meniń densaýlyǵymda esh kinárat joq. Boıymnyń uzyndyǵy da, salmaǵymnyń aýyrlyǵy da júris-turysyma kedergi keltirmeıdi. Kıim men aıaqkıimdi arnaıy tapsyryspen tiktiremin», - dep kúledi alyp jigit.

Eske sala ketelik, budan buryn Atyraý oblysynda boıy – 2 metr 15 sm, aıaǵynyń ólshemi – 56 sm alyp jigit turatynyn jazǵan edik.