Atyraýlyq aǵylshyn tili pániniń muǵalimi sabaqqa TikTok áleýmettik jelisin paıdalanady
Sabaqtaǵy shyǵarmashylyq tásil men oıyndar muǵalimniń oqýshylarmen jaqsy baılanys ornatýyna, shet tilin úırenýge qyzyǵýshylyqtaryn arttyrýǵa kómektesti, dep habarlaıdy QazAqparat QR Oqý-aǵartý mınıstrliginiń Telegram kanalyna silteme jasap.
Baspasóz qyzmetiniń málimetterine qaraǵanda, Islam Qadyrov Atyraýdaǵy №41 mektep-gımnazııasynda aǵylshyn tili pániniń muǵalimi bolyp jumys isteıdi. Ol sabaqta oıyn tásilin qoldanady. Sonyń arqasynda ustazdyń sabaqtary árdaıym qyzyqty ótedi. Oqýshylardyń ata-analarynyń aıtýynsha, Islam Qadyrov kelgeli aǵylshyn tili balalardyń súıikti pánderiniń birine aınalǵan.
«Ulym 4-synypta oqıdy. Maǵan muǵalimniń sabaqty ótkizý tásili men ádistemesi unaıdy. Buryn sabaqqa barǵysy kelmeıtin ulym endi mektepte aǵylshyn tili eń súıikti pán ekenin aıtady. Basqa balalardyń da aǵylshyn tilin úırenýge qyzyǵýshylyqtary artty. Balalar mektepke qýana baryp, árqashan jaqsy kóńil-kúımen oralady. Bul jaqsy kórsetkish dep oılaımyn», – deıdi balalardyń ata-analarynyń biri.
Islam Qadyrov alty jyldan beri aǵylshyn tili pániniń muǵalimi bolyp jumys istep keledi. Aıtýynsha, bala kezinen ustaz bolýdy, alǵan bilimin balalarǵa úıretýdi armandaǵan.
«Men bala kezimnen muǵalim bolǵym keletin. Maǵan balalarmen jumys istep, olarǵa aǵylshyn tilin úıretý jáne oqýshylaryma únemi jańa oıyndar oılap tabý unaıdy. Eger óz mamandyǵyńdy súıseń, onda bala júregine árqashan jol tabasyń dep oılaımyn. Meniń maqsatym – shet tilin úırený jolyn jeńildetý. Ol úshin aldymen ózimdi damytýǵa tyrysamyn, jańa ádis-tásilderdi izdeımin, sondaı-aq sabaqty erkin formatta ótkizemin», - dep aıtty Islam Qadyrov.
Búgingi tańda muǵalimniń TikTok paraqshasynda 5 myńǵa jýyq oqyrman bar. Ustaz elimizdiń kez kelgen óńirindegi balalar bilim alýy úshin óz paraqshasyn damytýdy jáne oqýshylaryna túrli baıqaýlar men olımpıadalarda qoldaý kórsetýdi josparlap otyr.
