Atyraýlyq 9 jasar shahmatshy Azııa chempıony atandy
ATYRAÝ. QazAqparat - Atyraýlyq 9 jasar shahmatshy Zarına Nurǵalıeva Azııa chempıony atandy, dep habarlaıdy QazAqparat tilshisi.
Oblystyq sport basqarmasynyń baspasóz hatshysy Іlııas Shaıhıevtiń aıtýynsha, 8-15 shilde aralyǵynda Shrı-Lankanyń Kalatýra qalasynda shahmattan 7-17 jasar mektep oqýshylary arasynda Azııa chempıonaty ótti. Oqýshylar arasyndaǵy 14-shi Azııa chempıonatynda álemniń 16 elinen 7-den 17 jasqa deıin 400 sportshy qatysty. Qazaqstandyq shahmatshylar 2 altyn, 1 kúmis jáne 1 qola jeńip aldy. Atyraýlyq shahmatshy qyz Zarına Nurǵalıeva «rapıd» túri boıynsha kúmis jáne «blıts» túri boıynsha altyn medalǵa ıe boldy. Taǵy bir sportshymyz Aıat Abdýllaev komandalyq esepte qola júldege ıe boldy.
Keshe Atyraý temir jol vokzalynda jeńimpazdardy týǵan-týystary jáne oblystyq sport basqarmasynyń qyzmetkerleri saltanatty túrde kútip aldy.
«Atyraýlyq úsh sportshymyz da óte joǵary nátıjege qol jetkizdi. Bıylǵy qurlyq chempıonatyna jan-jaqtan qatysýshylar kóp keldi. Onyń ózi jylma-jyl básekelestiktiń artyp kele jatqanyn kórsetedi. 9 jasar Zarınanyń shahmatpen aınalysyp júrgenine eki jylǵa jaqyndap qaldy», - deıdi jattyqtyrýshysy Jánibek Amanov.
Aıta ketý kerek, Zarınanyń bul sheteldegi alǵashqy jarysy. Soǵan qaramastan jerlesimiz eń úzdik atanyp otyr. Oblys quramasynyń aǵa jattyqtyrýshysy Sabyrbaı Gaısın Atyraýda shahmat sporty óte jaqsy jolǵa qoıylǵanyn atap aıtty. El birinshilikterinde sportshylarymyz tabysty nátıje kórsetip júr.
