Atyraýlyq 21 jastaǵy alaıaq Oral turǵynynyń 5 mln teńgesin alyp ketken
BQO polıtsııa departamentiniń baspasóz qyzmeti málim etkenindeı, ol 1969 jylǵy er adamnyń senimine kirip, aqshasyn kóbeıtip beremin degen jeleýmen aldaǵan.
Aqshasyn qaıtara almaǵan er adam polıtsııaǵa júgindi.
Jedel izdestirý sharalary barysynda kúdikti qolǵa tústi. Ol Oralǵa kelip, aılasyn asyrmaq bolǵan Atyraý qalasynyń turǵyny bolyp shyqty.
Qazirgi tańda onyń basqa da qylmystarǵa qatysy tekserilýde.
QR QK 190-baby 3-bóligine sáıkes sotqa deıingi tergeý amaldary júrgizilýde.
Taǵy bir alaıaq Ábilqaıyr han kóshesi boıyndaǵy kafelerdiń birinde 1991 jylǵy azamatshaǵa tıesili 1,5 mln teńgesin kóbeıtip beremin dep, qaltasyna basqan. Kóp uzamaı 1994 jylǵy kúdikti ustaldy. Bul derek boıynsha QR QK 190-baby 2-bóligine sáıkes tergeý amaldary jalǵasýda.
Eske sala keteıik, budan buryn BQO-da qyzmet babyn paıdalanyp 2 mln teńge jymqyrǵan 21 jastaǵy qyzdyń ustalǵanyn jazǵan bolatynbyz.