Atyraýǵa jumysqa turýǵa kelgen BQO turǵynynan 1,5 myń doza esirtki tárkilendi
Atyraý oblystyq polıtsııa departamentiniń baspasóz qyzmetinen málim etkendeı, ustalǵan kúdiktiniń 29 jastaǵy Batys Qazaqstan oblysynyń turǵyny ekeni anyqtalǵan.
«Esirtki qylmysyna qarsy is-qımyl basqarmasynyń qyzmetkerleri jedel-izdestirý is-sharasy kezinde Atyraý qalasynyń aýmaǵynda sıntetıkalyq esirtkini jasyryn tyǵý ádisimen aınalysqan kúdiktini ustady. Kúdiktiniń Batys Qazaqstan oblysynyń 1994 jylǵy turǵyny ekeni anyqtaldy. Tintý kezinde aq tústi untaq tárizdi 50 orama, mekenjaıynan aq tústi untaq tárizdi 3 dana zıp-paket tárkilendi. Tekserý kezinde kúdiktiniń Atyraý qalasyna tamyz aıynda jumysqa ornalasýǵa kelgeni belgili boldy. Saraptama qorytyndysyna sáıkes tárkilengen zattardyń jalpy salmaǵy 447,89 gr jáne 1 500 dozany quraıtyn sıntetıkalyq esirtki ekeni dáleldendi», -dep habarlady departamenttiń baspasóz qyzmeti.
Qazir kúdikti ustaldy. Oǵan «kúzetpen ustaý» túrindegi bultartpaý sharasy qoldanyldy.
Atalǵan derek boıynsha QR Qylmystyq kodeksiniń 297-babynyń 3-bóligimen sotqa deıingi tergep-tekserý bastaldy.
Ózge aqparat Qylmystyq-protsestik kodeksiniń 201-babyna sáıkes jarııalaýǵa jatpaıdy.
Eske sala ketelik, budan buryn Atyraýda sıntetıkalyq esirtki satqan tórt eresek adam 10, bir jasóspirim 3 jylǵa sottalǵanyn jazǵan bolatynbyz.
Atyraý qalasynda sıntetıkalyq esirtki zattaryn satqan Taraz qalasynyń tórt turǵynyn ustaǵan edi. Kúdiktilerge qatysty QR Qylmystyq kodeksiniń 297-babynyń 3-bóligimen qylmystyq is tergelgen. Sot sheshimimen kúdiktiler 10 jylǵa bas bostandyǵynan aıyrý jazasy berildi.
