Atyraýǵa Ystanbuldan ushyp kelgen 20 jolaýshy karantınge jatqyzyldy
ATYRAÝ. QazAqparat – Atyraýǵa «Ystanbul-Atyraý» áýe reısimen ushyp kelgen 20 jolaýshy karantınge jatqyzyldy, dep habarlaıdy QazAqparat.
Atyraý oblysynyń bas memlekettik sanıtarııalyq dárigeriniń orynbasary Gúlnaz Erbatyrovanyń málimetinshe, «Ystanbul-Atyraý» halyqaralyq áýe reısimen 115 jolaýshy ushyp kelgen. Olardyń arasynda 95 jolaýshynyń PTR-testiniń teris qorytyndysy týraly anyqtama bolǵan. Al qalǵan jolaýshylardy karantınge jatqyzý týraly sheshim qabyldandy.
«Túrkııadan áýe reısimen ushyp kelgen 20 jolaýshyda koronavırýs ınfektsııasyna PTR-test anyqtamasy bolmady. Sol sebepten, olar PTR-test qorytyndysy shyqqanǵa deıin karantınde bolady. Qazir Atyraýda karantındik statsıonar úshin eki nysan daıyndaldy. Bular – «Shaǵala» qonaqúıi men Atyraý servıstik kolledjiniń ǵımaraty», -dep habarlady Gúlnaz Erbatyrova.
Onyń aıtýynsha, PTR-test taldaýyn jasaıtyn zerthanalar táýlik boıy jumys isteıdi.
Eske salaıyq, QR Bas memlekettik sanıtar dárigeriniń qaýlysymen qazannyń 5-inen 6-syna qaraǵan túni áýejaılar halyqaralyq reıs jolaýshylaryn jańa talappen qabyldaı bastady. Jolaýshylarǵa saýalnama toltyrý, termometrııadan ótý jáne PTR-anyqtamany usyný mindetteldi.
Sondaı-aq buǵan deıin Atyraýdaǵy 200 oryndyq modýldik aýrýhana qurylysy týraly jazǵan edik.
