Atyraýǵa ushaqtyń shuǵyl túrde qonýyna ne sebep boldy
ATYRAÝ. QazAqparat - Jolaýshylar Atyraýǵa shuǵyl túrde qonǵan túrkııalyq «Boıngte» ne bolǵanyn aıtty, dep habarlaıdy «QazAqparat» HAA.
«Túrkııalyq áýe kompanııasynyń charterlik reısi búgin Reseıdiń Novosibir qalasynan tańǵy saǵat 8-00-de Antalııaǵa ushyp shyqty. Jolaýshylardyń barlyǵy oryndaryna otyryp, tynyshtalǵan kezde tereze syrtynan tarsyldaǵan daýys shyqty. Ýaqyt óte kele tarsyldaǵan dybys údeı túsip, onyń dvıgatelden ekeni aıqyn sezildi. Sodan soń bizge ushaqtyń Atyraý áýejaıyna májbúrli túrde qonatyndyǵyn aıtty. Bortta eshqandaı dúrligý bolǵan joq. Bári qalypty jaǵdaıda ótti, ushaq ta eshteńe bolmaǵandaı qıyndyqsyz qondy»,-dedi jolaýshylardyń biri Natalııa Balýtına.
Aıta keteıik, Boıng -737 ushaǵy Atyraýǵa jergilikti ýaqyt boıynsha saǵat 10-03-te qondy. Osy kezde ushaqty kórý úshin Astanadan arnaıy mamandar brıgadasy keledi dep kútilýde.
