Atyraýǵa Semeıde qurastyrylǵan 120 avtobýs jetkiziledi
ASTANA. QazAqparat - Qala ishindegi qoǵamdyq kólik máselesin sheshý úshin Atyraýǵa Semeı qalasynda qurastyrylǵan 120 jańa avtobýs jetkizilmek, dep habarlaıdy QazAqparat tilshisi.
«Shynyn aıtqanda, jolaýshy tasymaldaý baǵytynda másele joq deı almaımyz. Búgingi tańda Atyraý qalasyndaǵy 6 fırma 30 baǵyt boıynsha jolaýshy tasymalyn júzege asyryp otyr. Avtoparkterdiń tozyp turǵany belgili. Tasymaldaýshylar ózge óńirlerden eski apattyq avtobýstardy satyp alǵan kezde birshama syn aıtylǵanyn da bilemiz. Mine, osy máseleni eskere otyryp, biz Úkimetpen birge qajetti sapaly kólik quraldarymen qamtý baǵytynda baǵdarlamany qolǵa aldyq. Osy maqsatta «Atyraý» áleýmettik-kásipkerlik korporatsııasymen jáne jeke tasymaldaýshylarmen birlesip, «Damý» qory arqyly Semeı qalasynda shyǵarylatyn jańa avtobýstardy satyp alyp jatyrmyz», - dedi Atyraý oblysynyń ákimi Nurlan Noǵaev OKQ-da ótken baspasóz máslıhatynda.
Oblys basshysynyń aıtýyna qaraǵanda, búginde 120 jańa avtobýsty satyp alý boıynsha kelisim bar. 20 avtobýs qazirdiń ózinde qala ishinde júr. Odan bólek, Atyraý oblysy ákimdigi Qostanaıda shyǵatyn 50 birdeı «Ankaı» avtobýsyn satyp alý boıynsha jer qoınaýyn paıdalanýshylarmen kelisim jasasqan.
«Osy jumystardyń bári de qordalanǵan máselelerdi sheshedi degen úmittemiz», - dedi Nurlan Noǵaev.
Eske sala ketsek, atalmysh baspasóz máslıhatynda Nurlan Noǵaev óńirdegi balyq sharýashylyǵynyń tabysyn da atap ótken bolatyn. Onyń aıtýynsha, atyraýlyq balyq óńdeýshi kásiporyndar 500 keli qara ýyldyryq saýdalaý múmkindigine qol jetkizip otyr. Sonymen qatar, oblystaǵy kadr tapshylyǵy 5-6 jylda joıylatynyn tilge tıek etti.
Odan bólek, Nurlan Noǵaev Atyraý oblysynda jyl sońyna deıin 30 áleýmettik nysan iske qosylatynyn habarlaǵan edi. Aımaqta 7-20-25 baǵdarlamasy boıynsha 89 ótinish maquldanǵanyn aıta ketý kerek.
