Atyraýǵa Reseıdiń Astrahan oblysynan 5 dáriger keldi
ATYRAÝ. QazAqparat – Búgin Atyraý oblysyna Reseıdiń Astrahan oblysynan dárigerler kelip, gýmanıtarlyq júk jetkizildi, dep habarlaıdy QazAqparat.
Óńirlik kommýnıkatsııalar qyzmetiniń málimetinshe, Atyraýǵa búgin, 16 shildede Astrahannan bes medıtsına qyzmetkeri keldi. Oblys ákimi Mahambet Dosmuhambetov reseılik dárigerlerge osyndaı qıyn-qystaý kezeńde kómekke kelgeni úshin rızashylyǵyn bildirdi.
«Sizderge jáne Astrahan oblysynyń gýbernatory Igor Babýshkınge erekshe alǵys aıtqym keledi. Qazirgi ýaqytta bizdiń dárigerlerimiz aldyńǵy shepte aıanbaı eńbek etýde. Degenmen, birazy qaýipti indetti juqtyrdy, qalǵany indetpen kúresý ústinde. Atqaratyn jumys kóp. Bizge sizderdiń tájirıbe, bilimderińiz ben bilikterińiz qajet. Sondyqtan búginnen bastap kirisetin jumystaryńyzǵa sáttilik tileımin», - dedi Atyraý oblysynyń ákimi Mahambet Dosmuhambetov.
Kezdesýde astrahandyq dárigerlerdiń juqpaly aýrýlarǵa arnalǵan arnaıy blokta tikeleı KVI juqtyrǵan naýqastarmen jumys isteıtindigi, sondyqtan olardyń áriptesterine keńes berýmen shektelmeı, ınfektsııa juqtyrǵandardy emdeýge tikeleı qatysatyny, sondaı-aq, «qyzyl aımaqqa» kiretindigi aıtyldy. Oblystyq densaýlyq saqtaý basqarmasynyń basshylyǵy reseılik dárigerler oblystyq kardıologııalyq ortalyq pen ınfektsııalyq statsıonarda jumys isteıtinin, qajet bolsa keı dárigerlerdi aýdandarǵa jiberetinin aıtty.
«Bizdi óte jyly qabyldaǵandaryńyzǵa raqmet. Tolyqqandy jumys jasaýymyz úshin barlyq jaǵdaı jasalǵan. Endi biz áriptesterimizge koronavırýspen kúreste kómektesý úshin bar kúshimizdi salýǵa tyrysamyz. Qoldan kelgenniń bárin jasaımyz», - dedi astrahandyq dáriger Anna Chepel.
Eske sala keteıik, Astrahan oblysynyń dárigerlerine jalaqy, turǵyn úı, tamaq jáne kólikpen baılanysty barlyq qajetti jaǵdaı jasalǵan.
