Atyraýǵa medıtsına mamandaryn tartý úshin arnaıy baǵdarlama ázirleý kerek - Prezıdent
«Óńirdiń densaýlyq saqtaý júıesin damytýǵa basa mán bergen jón. Oblysta ókpe jáne júrek-qan tamyrlary aýrýyna shaldyqqan naýqastardyń sany kóbeıip barady. Ana men bala ólimi de az emes. Buǵan óńirdegi ekologııalyq ahýaldyń nasharlyǵy, bilikti dárigerlerdiń tapshylyǵy sebep bolyp otyr. Osy oraıda, basty mindettiń biri – medıtsınalyq ınfraqurylymdy jaqsartý. Atyraý qalasynda emhana ǵımarattary tapshy. Oblystaǵy medıtsına mekemeleriniń 40 paıyzǵa jýyǵy osyndaı jaǵdaıda jumys istep jatyr. Psıhıkalyq densaýlyq ortalyǵy, onkologııalyq dıspanser, jedel járdem stantsııalarynyń jaǵdaıy syn kótermeıdi. Tipti, bul mekemelerdiń ǵımarattary paıdalanýǵa jaramsyz. Osy máseleniń bárin shuǵyl sheshý qajet», - dedi Qasym-Jomart Toqaev.
Atyraý oblysynda birqatar densaýlyq saqtaý nysanynyń qurylysy kelesi jyly bastalýy kerek.
«Eń aldymen, óńirge medıtsına mamandaryn tartý úshin arnaıy baǵdarlama ázirleý kerek. Jergilikti kadrlardyń biliktiligin arttyrý mańyzdy. Sondaı-aq, oblystyq perzenthanany kúrdeli jóndeýden ótkizip, jabdyqtaǵan jón. Atyraýda jańa onkologııalyq dıspanser salý máselesin pysyqtaý qajet. Oblysta birqatar densaýlyq saqtaý nysanynyń qurylysy josparlanyp otyr. Qurylys jumystaryn kelesi jyly bastaý kerek. Ana men balanyń, jalpy turǵyndardyń densaýlyǵyn saqtaý – eldiń damý deńgeıin aıqyndaıtyn kórsetkishtiń biri. Biz densaýlyq saqtaý salasyna barlyq resýrsty, kúsh-jigerimizdi jumyldyramyz. Osy oraıda, men sıntetıkalyq esirtki máselesine erekshe nazar aýdarǵym keledi. Ókinishke qaraı, adam psıhıkasyna áser etetin zattar tez taralyp bara jatyr. Bul – óte qaýipti úrdis. Qazaqstanda esirtkige táýeldi 110 myń adam esepte tur. Onyń ishinde balalar da bar. Bul – biz biletin málimet qana. Osy rette, Іshki ister mınıstrliginiń esirtkige qarsy kúresti tıimdi júrgizýin talap etemin», dep atap ótti Memleket basshysy.