Atyraýǵa koronavırýsty emdeýge arnalǵan dári-dármekter jetkizildi
ATYRAÝ. QazAqparat – 14 shildeden 15 shildege qaraǵan túni Atyraýǵa medıkament tıelgen júk ushaǵy kelip qondy dep habarlaıdy Atyraý oblystyq kommýnıkatsııalar qyzmeti.
Keshe melekettiń qoldaýymen Úndistannan Almatyǵa COVID-19 ınfektsııasyn emdeýge arnalǵan dáriler jetkizilgen bolatyn. 3 tonna kólemindegi preparattar Atyraý oblysy ákimdiginiń uıymdastyrýyn «Teńizshevroıl» kompanııasy ushaǵymen Atyraýǵa shuǵyl jetekizildi. Qazirgi kezde ýaqytsha tapshy bolyp turǵan 15 túrli dári – dármekter dárihanalar jelisine taratylady. Óıtkeni, Atyraýdaǵy emdeý mekemeleri qajetti medıkamentpen 94%-ǵa qamtamasyz etilgen.
«Qazaqstan Prezıdentiniń tapsyrmasymen aımaqta dárihanalar jelisin qajetti dári-dármekpen qamtamasyz etý boıynsha júıeli jumystar atqarylýda. Búgin tańda arnaıy júk ushaǵymen úlken kólemde dári jetkizildi. Atyraý oblysy ákiminiń mindetteýine sáıkes, ótken aptadan beri oblys dárihanalaryn dári-dármekpen shuǵyl qamtamasyz etý boıynsha jumystar atqarylyp jatyr. Turǵyndar suranysy tolyqtaı qamtamasyz etilgenshe, dárihanalarǵa dári-dármek jetkizý jalǵasa beredi» - dedi Atyraý oblysy ákiminiń orynbasary Erjan Ábilhanov.
Dárihanalarǵa medıkamentterdi jetkizý jumysy búgin bastalady. Sonymen birge, osy juma kúni medıkamenttiń taǵy bir partııasy júk kóligimen jetkiziledi dep kútilýde. Osylaısha, dárihanalardy dári-dármekpen qamtamasyz etý boıynsha jumystar turaqty jalǵasa beredi.
