Atyraýǵa dári-dármekterdiń 430 túri shuǵyl jetkizildi
ATYRAÝ. QazAqparat –Oblys ákimi Mahambet Dosmuhambetovtiń málimetinshe, Atyraýda medıtsınalyq-sanıtarııalyq alǵashqy kómek uıymdaryna dárilik zattar jetkizilgen, dep habarlaıdy QazAqparat.
Qazir oblysta 314 dárihana bar. Onyń 223-i oblys ortalyǵynda ornalasqan. Sońǵy aptadaǵy dári-dármek tapshylyǵy máselesin sheshý úshin «SK-Farmatsııa» arqyly statsıonarlarǵa jáne medıtsınalyq-sanıtarııalyq alǵashqy kómek uıymdaryna birqatar medıtsınalyq preparattar ákelinýde.
«Meniń tapsyrmama sáıkes, qalalyq ákimdiktiń kómegimen oblysqa 220 mıllıon teńgeni quraıtyn dári-dármekterdiń 430 túri shuǵyl jetkizildi. Onyń arasynda qazirgi kezde eń qajetti degen azıtromıtsın, tsefazolın, tseftrıakson syndy antıbıotıkter men ystyqty túsiretin dáriler men dárýmender bar. Bul preparattar partııasy oblys halqynyń qajettiligin qamtamasyz etedi. Dári-dármekter qaladaǵy jáne aýdandardaǵy dárihanalarǵa túgel taratylyp berildi. Apta sońynda taǵy osyndaı kólemde dári-dármekter jetkizilip, qajetti dárilerdiń belgili deńgeıde qory bolady. Condaı-aq, kásipkerlerdi tarta otyryp aldyrǵaly otyrǵan preparattardy áleýmettik jaǵdaıy tómen toptarǵa emhanalar arqyly taratýdy da oılastyryp otyrmyz», - dedi oblys ákimi Mahambet Dosmuhambetov.
Eske sala ketelik, budan buryn Atyraý oblysynda 278 medıtsına mamany jetispeıtinin jazyp edik.
