Atyraýǵa alǵash ret Elbasynyń kóshpeli kórmesi keldi
ATYRAÝ. QazAqparat - Kórmede atyraýlyqtar 2 aı boıy túrli jádigerlermen tanysa alady, dep xabarlaıdy QazAqparat tilshisi.
Búgin oblystyq Shómishbaı Sarıev atyndaǵy kórkemsýret jáne qoldanbaly-sándik óner mýzeıinde «N. Nazarbaev: dáýir, tulǵa, qoǵam» kóshpeli qor kórmesiniń saltanatty ashylý rásimi ótti.
Kórmeniń ashylý saltanatyna QR Prezıdenti keńsesiniń basshysy, QR Tuńǵysh Prezıdenti Elbasy Kitaphanasy dırektorynyń mindetin atqarýshy Mahmud Qasymbekov, Atyraý oblysynyń ákimi Nurlan Noǵaev, óńirdiń zııaly qaýym ókilderi men stýdent jastar qatysty.
Jıynda sóz alǵan Maxmud Qasymbekov Atyraý jerine Elbasynyń arnaıy tapsyrmasymen kelgenin atap ótti.
«Qasıetti Atyraý jerine úlken tarıxı mańyzy bar qundy jádigerlerdi alyp keldik. Biz búgin tuńǵysh prezıdentimiz N.Nazarbaevtyń kóshpeli mýzeıin tanystyrǵaly otyrmyz. Kórmede 1000-nan asa qundy jádigerler men qoljazbalar, 50-den asa memleket tabystaǵan marapattar bar. Sonymen qatar, Elbasynyń tikeleı nusqaýlyǵymen munaıly ólkege 130 adamnan quralǵan prezıdent orkestrimen birge kelip otyrmyz. Bul - Elbasynyń Atyraý jurtshylyǵyna arnaıy syıy»,- dedi QR Prezıdenti keńsesiniń basshysy.
Kórmeniń negizgi maqsaty - kitaphana jınaqtary negizinde Qazaqstan Respýblıkasynyń Tuńǵysh Prezıdenti Elbasynyń táýelsiz Qazaqstannyń tarıhı ómirindegi rólin júıeli túrde keńinen kórsetý.
Kórme tórt bólimnen turady:
1. Elbasy joly.
2. Elbasy fenomeni.
3. Álem tanyǵan Elbasy.
4. Elbasy mártebesi el mártebesi.
Saltanatty sharada oblys ákimi Nurlan Noǵaev sóz alyp, atyraýlyqtardy kórmeni tamashalaýǵa shaqyrdy.
«Táýelsiz Qazaqstan men Nursultan Nazarbaev - egiz uǵym. Elimiz táýelsizdikke qol jetkizbeı turyp Elbasymyz jeke jaýapkershilik alyp, barlyq qazaqstandyqtar qoldaýymen álemdik qaýymdastyqta óz orny bar memleketimizdi qurǵan bolatyn. Osy kezeńderde prezıdentimiz óz kóregendiligimen talaı syndarly saǵattardan ótti. Búgingi beıbitshiligimiz - sol eńbektiń jemisi. Kórme barysynda Elbasy týraly buryn-sońdy beımálim bolǵan aqparattardy alyp, álemdik saıasattaǵy tulǵalardyń elimiz, kóshbasshymyz týraly oı-pikirlerimen tanysa alasyzdar. Búgingi shara - tarıxı shara. Sol tarıxtyń kýási bolýǵa barlyǵyńyzdy shaqyramyn»,- dedi oblys basshysy.
Aıta ketelik, kóshpeli kórme jobasy 2017 jyldyń qarashasynda Almatydan bastaý alyp, 2018 jyldyń aqpan aıynda Shymkentte óz jumysyn jalǵastyrdy. Eki qalada da joǵary deńgeıde ótken kórmeni 250 myńnan astam adam tamashalady.
Atyraý qalasynda «N. Nazarbaev: dáýir, tulǵa, qoǵam» kórmesi 2 aı bolady. Sh. Sarıev murajaıynda kórmeni tegin tamashalaýǵa múmkindik bar.
