Atyraýǵa álemniń 5 memleketinen mýaıtaı sheberleri keledi
ASTANA. QazAqparat - 3 qyrkúıekte barlyq jekpe-jek óneriniń jankúıerlerin umytylmas jekpe-jek kútedi. Atyraýda mýaıtaıdan qazaqstandyq ǵalym Ámen Amanqulov atyndaǵy halyqaralyq týrnır ótedi, dep habarlaıdy óńirlik kommýnıkatsııalar qyzmetiniń baspasóz qyzmeti.
Týrnırde qazaqstandyq mýaıtaı sheberleri Brazılııa, Taıland, Reseı, Avstrııa jáne Ońtústik Afrıkadan kelgen qarsylastarmen kúsh synasady. Qarsylastardyń barlyǵy derlik óz memleketteriniń kásibı deńgeıdegi sportshylary. Sondyqtan, atyraýlyqtar tartysty saıystyń kýágeri bolady.
Saıys Atyraý oblystyq dene shynyqtyrý jáne sport basqarmasy, «Elýhan» Qazaqstan Respýblıkasy Mýaıtaı federatsııasy jáne Mýaıtaı federatsııasynyń Atyraý oblystyq fılıalynyń uıymdastyrýymen ótkeli otyr.
Týrnır jergilikti ýaqyt boıynsha keshki saǵat 18:00-de Muz aıdyny saraıynda ótedi.
