Atyraýdyń Jylyoı aýdanynda IT-synyp ashyldy
Aqylbek Súleımenov - Jylyoı aýdany Qulsary qalasyndaǵy №8 mektep janynan ashylǵan IT-synyptyń alǵashqy oqýshylarynyń biri. 12 jasar Aqylbektiń kompıýterlik baǵdarlamalarǵa qyzyǵýshylyǵy zor.
«Óz betimshe shaǵyn mýltfılmder qurastyrýdy úırengim kelip júrgende IT-synyp ashylǵany óte jaqsy boldy. Endi men bul jerde anımatsııalyq fılmder jasaýdy, túrli oıyndar qurastyrýdy úırenemin», - deıdi ol.
«Aýdanymyzda IT-synyptyń ashylýy - eldiń bas partııasynyń erekshe qamqorlyǵy dep bilemin. Jáne bul zaman talabyna saı ashylǵan arnaıy synyptyń balalardy 8 jastan bastap qabyldaýy kóńil qýantady. Balam Sultan 6-synypta oqıdy, jańa tehnologııalardy jetik meńgergen. Bul jerde bilimin shyńdap, bolashaǵyna baǵdar alyp shyǵaryna senimdimin», - deıdi Jylyoı aýdanynyń turǵyny Aınur Qojahmetova.
Bul ıgi bastama oqýshylardy kompıýterlik saýattylyqqa tárbıelep qana qoımaı, bolashaqta óz mamandyǵyn durys tańdaýyna jol ashady.
«Qazir munda 8-16 jas aralyǵyndaǵy 40 oqýshy bilim alyp jatyr. Alǵashqy kúnnen bastap-aq oqýshylardyń yntasy zor, belsendilikpen jumys jasaýda. Oqýshylar jalpy Scratch, 3D max modeldeý, Piton baǵdarlamalaryn úırenýge qumartyp otyr. Ázirge qarapaıym algorıtmder qurýdy, baǵdarlamalar jasaýdy, ártúrli anımatsııalyq mýltfılmder jobasyn, baǵdarlamalyq modelder jasap úırený josparlanyp otyr», - deıdi ІT-synyp muǵalimi Shahrızada Nurysheva.
Aıta ketelik, «Tsıfrlyq Qazaqstan» memlekettik baǵdarlamasyn júzege asyrý maqsatynda qolǵa alynǵan joba aıasynda Atyraý oblysynda bıyl 10 ІT-synyp ashyldy. Bul mektepterde 2018 jyly - 700, 2019 jyly - 1500, 2020 jyly - 2000 bala oqytylady.
