Atyraýdyń Jylyoı aýdanyna 47 muǵalim men 9 dáriger keldi
ATYRAÝ. QazAqparat –Atyraý oblysyndaǵy Jylyoı aýdanyna 47 muǵalim men 9 dáriger keldi, dep habarlaıdy QazAqparat.
Jylyoı aýdanynyń ákimi Halel Jamalovtyń málimetinshe, bilim berý salasynda 1641 muǵalim jumys isteıdi. Al mektepterde 18 myńnan astam oqýshy bilim alady.
«Bıylǵy jańa oqý jylynda Jylyoı aýdanyndaǵy mektepterge 47 muǵalim jumysqa ornalasty. Biraq, áli 45 muǵalim jetispeıdi. Ásirese, orys synyptaryna matematıka, fızıka pánderiniń, sondaı-aq, bastaýysh synyptyń muǵalimderi qajet», - deıdi Hálel Jamalov.
Onyń aıtýynsha, aýdannyń emdeý oryndary 9 dárigermen tolyqqan. Onyń ishinde jeteýi – jas maman.
«Aýdanda 1 ortalyq aýrýhana, 1 emhana, 1 temir jol aımaqtyq fılıaly, 1 aýdandyq emhananyń fılıaly, 6 dárigerlik ambýlatorııa bar. Qazir atalǵan medıtsına mekemelerine 24 joǵary bilimdi dáriger jetispeıdi», - dedi Jylyoı aýdanynyń ákimi.
Sondaı-aq, jyl sońyna deıin Jylyoı aýdanynda 10 mamanǵa kóterme járdemaqy berý kózdelip otyr.
«Bıyl jyl sońyna deıin 2 mamanǵa bıýdjettik nesıe, 10 mamanǵa bir rettik kóterme járdemaqy beriledi. Al, 1 mamanǵa bıýdjettik nesıe berilip, 6 maman kóterme járdemaqy aldy», - deıdi Jylyoı aýdanynyń ákimi Halel Jamalov.
