Atyraýdyń jastar teatry halyqaralyq festıvaldiń bas júldesin ıelendi
ATYRAÝ. QazAqparat – Atyraýdyń jastar teatry halyqaralyq festıvaldiń bas júldesin ıelendi, dep habarlaıdy QazAqparat.
Mahambet atyndaǵy akademııalyq qazaq drama teatrynyń ártisteri Gúlnur Qaıyrlıeva men Ámirjan Nurlanuly jastar teatryn qurǵan edi. Olar trýppa múshelerin stýdentter men joǵary synyp oqýshylarynyń arasynan tańdaǵan.
«Kastıng kezinde akterlik ónerge beıim jastardyń kóp ekenin baıqadyq. Alǵashqy spektakldi Jaıyq jaǵalaýynda, qalalyq saıabaqtarda qoıdyq. Búgingi jastardyń kóńilinen shyǵatyn, aýdıtorııasyna laıyq taqyryptardy repertýarǵa engizýge tyrystyq» -deıdi teatr jetekshisi Ámirjan Nurlanuly.
Jaqynda jastardyń óner ujymy Kerch qalasynda udaıy ótetin «Bosporskıe agony» halyqaralyq teatr festıvaline attanǵan edi. Bul festıvalge atyraýlyq jastar aǵylshyn jazýshysy Bernard Shoýdyń «Tsezar jáne Kleopatra» pesasynyń jelisimen «Kleopatra» dramasynyń premerasyn usyndy. Bas rejısseri – Muqanǵalı Tomanov.
«Bul – karantın kezindegi alǵashqy gastrol. Spektakl premerasy ózge eldiń sahnasynda alǵash ret usynyldy» - deıdi teatr dırektorynyń orynbasary Nurgúl Qumarqyzy.
Onyń aıtýynsha, bıyl HHІІІ ret ótken halyqaralyq festıvalde 11 teatr baq synaǵan. Solardyń arasynan atyraýlyq jastar teatry eki júldeni ıelendi. Festıvaldiń bas júldesi – «Úzdik spektakl» atalymy munaıly óńirdiń jas órenderi usynǵan «Kleopatra» qoıylymyna berildi. Sondaı-aq, Kleopatrany somdaǵan atyraýlyq jas akter Ǵaını Kýkatova «Eń úzdik áıel róli» atalymyn ıelendi.
Eske sala ketelik, budan buryn Atyraýda qýyrshaq teatrynyń alǵashqy premerasy sátti ótkenin habarlaǵan edik.
