Atyraýdyń úzdik termeshisi anyqtaldy
ATYRAÝ. QazAqparat - Atyraýda «Tekti sózdiń tóresi - terme» termeshiler baıqaýy ótti. Konkýrsqa 15 termeshi qatysty, dep habarlaıdy «QazAqparat» HAA tilshisi.
«Konkýrs qazaqtyń kóne dástúrli ónerleriniń biri - termeni nasıhattaý maqsatynda uıymdastyryldy. Oǵan D.Nurpeıisova atyndaǵy halyq mýzyka akademııasy Atyraý mýzykalyq kolledjiniń, Atyraý medıtsınalyq kolledjiniń, mýzykalyq mektep oqýshylary men qala kolledjderiniń stýdentteri, balalar baqshalarynyń tárbıeshileri qatysty. Aqyndar tanymal qazaqstandyq avtorlardyń týyndylaryn oryndap, óz shyǵarmalarymen tanystyrdy», - dedi Qalalyq mádenıet jáne tilderdi damytý bóliminiń basshysy Aqylbek Rysqalıev.
Bas júldeni D.Nurpeıisova atyndaǵy halyq mýzyka akademııasy Atyraý mýzykalyq kolledjiniń stýdenti Arýjan Erimova jeńip aldy. Birinshi jáne ekinshi orynǵa osy kolledjdiń stýdentteri Saıat Qulshaev pen Alıda Hýanova ıe boldy. Úshinshi oryndy Damby jáne Qaıyrshahty balalar mýzyka mektebiniń oqýshylary Daryn Jumashev pen Aıgerim Qýandyqova ózara bólisti.
Bul konkýrs «Bolashaqqa baǵdar: rýhanı jańǵyrý» baǵdarlamasyn júzege asyrý aıasynda ótti. Ony «Jas óren» qoǵamdyq birlestigi men qalalyq mádenıet jáne tilderdi damytý bólimi uıymdastyrdy.
Foto: qamshy.kz
