Atyraýdyń taekvondoshy qyzdary halyqaralyq týrnırden 6 altyn medal aldy
ATYRAÝ. QazAqparat – Atyraý oblysynyń taekvondoshy qyzdary halyqaralyq týrnırden 6 altyn medal alyp, komandalyq esepte birinshi oryndy ıelendi, dep habarlaıdy QazAqparat.
Oblystyq sport jáne dene shynyqtyrý basqarmasynyń baspasóz qyzmetinen málim etkendeı, atyraýlyq taekvondoshy qyzdar Pákistannyń Islamabad qalasynda ótken «2021 COAS Pakistan Open Taekwondo Championships» halyqaralyq týrnırine qatysyp, komandalyq esepte birinshi orynǵa ıe bolǵan.
«G-1 deńgeıinde ótken jarysta Atyraý oblysynyń taekvondoshylary 6 altyn, 1 kúmis medaldi jeńip aldy. Qarsylastarynyń bárin qapy qaldyryp, sheberligimen tanylǵan Aıdana Edilbaeva (46 kelige deıin), Nuraı Baýyrjanova (49 kelige deıin), Jadyra Haırýllına (62 kelige deıin), Nuraı Hýsaınova (67 kelige deıin), Jansel Denız (73 kelige deıin) men Aıgúl Elýbaı (73 keliden joǵary) týrnır chempıony atandy. Aqtyq synda utylǵan Dıana Ábsenova (62 kelige deıin) kúmis medaldy enshiledi» -dep habarlady basqarmanyń baspasóz qyzmeti.
Halyqaralyq týrnırdiń qorytyndysymen taekvondoshy Jansel Denız «úzdik sportshy», al, bapker Sáýle Sardarova «Úzdik jattyqtyrýshy» atalymynda arnaıy marapatqa ıe boldy.
Eske sala ketelik, budan buryn atyraýlyq sportshy djıý-djıtsýdan álem chempıony atanǵan bolatyn.
