Atyraýdyń tabıǵı rezervatynda jalyndaǵan ot 18 gektarǵa jetti
ATYRAÝ. QazAqparat - Atyraýda «Aqjaıyq» tabıǵı rezervatynda jalyndap jatqan ottyń aýmaǵy 18 gektarǵa jetti, dep habarlaıdy QazAqparat tilshisi.
«16 shilde kúni, tańǵy ýaqytta Erkinqala aýylynyń mańyndaǵy «Aqjaıyq» rezervatynda qamys tutanǵan bolatyn. Búgingi kúni órt tolyqtaı sóndirilgen joq. Ottyń tutaný qaýpi áli de saqtalýda. Órttiń aýmaǵy 15-18 gektar shamasynda. Qazirgi tańda «Aqjaıyq» rezervatynda jalynmen kúres jalǵasýda. Qoryq aýmaǵynda «Aqjaıyq» rezervatynyń 30 adamy men 6 tehnıkasy jumys isteýde. Budan bólek, Tótenshe jaǵdaılar departamentiniń 20 qyzmetkeri men 2 órt sóndirý tehnıkasy jumyldyrylǵan», - deıdi oblystyq Tótenshe jaǵdaılar departamentiniń baspasóz hatshysy Janar Qarjaýbaeva.
Atyraýdyń tabıǵı rezervatynda ottyń tutanǵanyn jáne onyń saldarynan qalany qoıý tútin basqanyn buǵan deıin jazǵan bolatynbyz.
