Atyraýdyń sý jetkizýshi kásiporny tutynýshylarǵa 359 mln teńge qaıtarady

ATYRAÝ. QazAqparat – «Atyraý oblysy sý arnasy» kommýnaldyq memlekettik kásiporny tarıftik smeta shyǵyndary boıynsha bekitilgen kólemniń 5%-dan astamyn oryndamaǵany úshin tutynýshylarǵa 359 mln teńgeni qaıtarady, dep habarlaıdy QazAqparat tilshisi.

«Sýmen jabdyqtaý jáne sý burý boıynsha amortızatsııalyq aýdarymdardy maqsatsyz paıdalanýǵa jol bergen. «Tabıǵı monopolııalar týraly» zańnyń buzylýy kommýnaldyq kásiporynnyń rettelip kórsetiletin qyzmetter boıynsha 2020-2021 jyldarǵa bekitilgen tarıftik smetalardyń oryndalýy týraly esebin taldaý barysynda anyqtalyp otyr. Osyǵan baılanysty, «Atyraý oblysy sý arnasy» úshin ýaqytsha ótemdik tarıf bekitildi. Eki qyzmet boıynsha tutynýshylarǵa qaıtarylatyn jalpy soma - 359,5 mln teńge. Ótemdik tarıf 1 mamyrdan bastap qoldanysqa engizilip, 2023 jylǵy 30 sáýirge deıin jalǵasady. Ótemdik tarıf Atyraý qalasy men Maqat aýdanynda qoldanylady», - dep habarlady Tabıǵı monopolııalardy retteý komıtetiniń oblystyq departamentinen.

Sondaı-aq, «Atyraý oblysy sý arnasy» kásipornyna QR Ákimshilik quqyqbuzýshylyq kodeksiniń «Tabıǵı monopolııalar týraly zańnamany buzý» babymen aıyppul salyndy.

Eske sala ketelik, buǵan deıin Atyraýda gaz quıatyn kompanııa baǵany sebepsiz qymbattatyp, 2 mlrd teńge tabys tapqany habarlanǵan edi.