Atyraýdyń shalǵaı aýyldaryna gaz tartylyp jatyr
Qurmanǵazy aýdanyna jumys saparynda Nurlan Noǵaev Azǵyr óńirindegi aýyldaryna bardy.
Atalǵan aımaqtaǵy gaz qubyrynyń qurylysy 2017 jyly bastalǵan, ol 2019 jyldyń birinshi jartyjyldyǵynda aıaqtalady dep josparlanýda. Jalpy gaz qubyrynyń uzyndyǵy 365 shaqyrymdy quraıdy. Qazirgi ýaqytta 274 km-ge qubyr tartylǵan. Reseımen shekaralas jatqan Azǵyr óńirinde 10 eldi mekende 7 myńnan astam turǵyn bar. 
«Memleket basshysynyń shekaralas aımaqtardy damytý qajettigi týraly tapsyrmasyna sáıkes Azǵyr óńirindegi eldi mekenderdi gazdandyrý jáne elektr jelilerin júrgizý kontseptsııasyn jasadyq. Qazir gazdandyrýdyń sońǵy satysy júrip jatyr. Endigi mindet irgege kelip turǵan gazdy aýyl ishine tartý bolyp otyr. Bul másele jergilikti atqarýshy organdardyń baqylaýynda bolady», -dedi Nurlan Noǵaev.
Aımaq basshysy, sondaı-aq, Azǵyr óńirindegi Qoshalaq, Úshtaǵan, Asan, Azǵyr, Balqudyq áleýmettik nysandardy aralap, Reseı Federatsııasymen shekaradaǵy "Balqudyq" ruqsat berý bólimshesiniń jumysymen tanysty. Shalǵaıdaǵy aýyldardyń turǵyndarymen kezdesti.
Aıta keteıik, 2016 jyly Nurlan Noǵaev Atyraý oblysyndaǵy 7 aýdandy jáne barlyq 72 selolyq okrýgke baryp, qaramaǵyndaǵylarǵa eldi mekenderdi damytýǵa qatysty 223 tapsyrma bergen edi.
