Atyraýdyń Reseımen shekaradaǵy aýdanynda kanaldar túbi qazylyp jatyr
Qurmanǵazy aýdany ákimdigi baspasóz qyzmetiniń aqparatyna qaraǵanda, 2021 jyly 243,5 shaqyrym kanaldyń túbin tereńdetýge tapsyrys berilgen. Reseı Federatsııasymen shekaradaǵy Qıǵash ózenine keletin sýdyń kólemin arttyrý jáne gıdrologııalyq rejımin jaqsartý maqsatynda tereńdetý jumystary jalǵasyp jatyr.
Byltyr Qurmanǵazy aýyldyq okrýgi boıynsha 243,5 shaqyrym kanaldyń túbin qazýǵa usynys berilgen bolatyn. Sharon ózeniniń 127 shaqyrymynda túp tereńdetý jumystary aıaqtalǵan.
«Qazir birinshi kezekte kanaldardyń 99,6 shaqyrym túbin tereńdetýge joba jasaqtalyp, merdiger retinde tańdalǵan «Pavlodar ózen porty» AQ qazý jumysyn bastady. Al, 143 shaqyrym boıynsha jobalyq smetalyq qujaty jasaqtalyp jatyr», - deıdi aýdandyq qurylys, sáýlet jáne qala qurylysy bólimi basshysynyń mindetin atqarýshy Renat Nuǵmanov.
Onyń málimetine súıensek, Pankrashın-1 kanalynda 508 metr, Pankrashın-2 kanalynyń 1,6 shaqyrymy, Lenıvyı-1 kanalynyń 2,4 shaqyrymy tereńdetilgen. Endi Lenıvyı-2 kanalynyń túbin tereńdetý jumystary júrgizilip jatyr.
Reseımen shekaradaǵy aýdanda kanaldardyń túbin tereńdetý jumysyna 33 qyzmetker men 10 ekskavator tartylǵan. Atalǵan jumystar 2024 jyly tolyqtaı aıaqtalatyny josparlanyp otyr.
Eske sala ketelik, buǵan deıin Atyraý ekologteri Reseımen shekaradaǵy Qıǵash ózeni sýynyń sapasyn teksergenin habarlaǵan edik. Buǵan jaqynda Reseıdiń Volgograd oblysyndaǵy Edil ózenine kárizdik aǵyn sý jiberilgeni sebep bolǵan.
«Reseımen shekaradaǵy Qıǵash ózeninen sý synamalary 10 komponentke baılanysty alyndy. Onyń ishinde azot, sýlfat, nıtrattar, munaı ónimderi, hlorıd jáne basqa da quramdas bólikter boıynsha irikteldi. Tekserý nátıjesinde Atyraý oblysynyń Qurmanǵazy aýdanyndaǵy Qıǵash ózeniniń sýynda normatıvterdiń belgilengen shamadan asý deregi tirkelgen joq», - dedi Atyraý oblysynyń bas memlekettik ekologııalyq ınspektory Syrym Tilegenov.