Atyraýdyń Prımorskıı kanalynda qyrylǵan 4 tonnaǵa jýyq balyq jınaldy
NUR-SULTAN. QazAqparat - Atyraýdyń Prımorskıı kanalynan 3,7 tonna óli balyq jınaldy. Bul týraly QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet málim etti, dep habarlaıdy QazAqparat.
«2020 jyldyń 21 sáýirinde tańǵy saǵat 7-10 aralyǵynda «Aqjaıyq» memlekettik tabıǵı qoryǵy aýmaǵyndaǵy «Prımaorskıı» kanalynda otteginiń jetispeýinen Kaspııden Jaıyqqa shalajansar balyqtar aqqan. Ásirese chastık balyqtary - aqtaban men torta balyqtyń iri túrleri kóp kezdesedi jáne syrttaı esh zaqym bolmaǵan, - dep jazdy baspasóz hatshysy Facebook -tegi paraqshasynda.
Aldyn ala boljam boıynsha, balyqtardyń bul kúıine teńiz jaqtan birneshe kún soqqan jel men Prımorskıı kanalyna teńiz sýynyń tolýy sebep bolǵan. Qoıyrtpaq sý kanalǵa quıylyp, balyqtardyń ýlanýyna yqpal etken.
«Balyqtyń biraz bóligi Jaıyq ózenine jetip, qolaıly ortada qaıta jandandy. Qyrylǵan balyq synamalary zerthanalyq tekserý úshin Atyraý aýmaqtyq veterınarlyq ınspektsııasyna jiberildi. Sonymen birge, «Qazgıdromet» JShS Atyraýdaǵy fılıal qyzmetkerleri hımııalyq zertteý úshin sý synamalaryn aldy», - deıdi S. Dildahmet.
2020 jyldyń 21-27 sáýiri aralyǵynda 3,7 tonna qyrylǵan balyq joıyldy. Bul jumystar áli de jalǵasady.
Balyqtyń ólý sebebi zerthanalyq tekserý nátıjelerinen keıin qosymsha jarııalanady. Sý qoımasy táýlik boıy baqylaýda.
