Atyraýdyń ortalyq meshitinde Ramazan aıynda «Tegin taksı» qyzmet kórsetedi

ATYRAÝ. QazAqparat - Atyraýdyń ortalyq meshitinde qasıetti Ramazan aıynda «Tegin taksı» qyzmet kórsetedi, dep habarlaıdy QazAqparat tilshisi.

Qazaqstan musylmandary dinı basqarmasynyń Atyraý oblysy boıynsha ókili Batyrjan Mansurovtyń bastamasymen iske qosylǵan joba Taraýıh namazyna kelgen jamaǵatqa, sonyń ishinde úlkenderge qyzmet kórsetedi.

«Qasıetti Ramazan - jaqsylyqta jarysatyn aı. Eger Siz jaqsylyq is qylsańyz, Alla Taǵalanyń quzyrynda sansyz saýap jazylady. Ortalyq «Imanǵalı» meshitine kúndelikti Taraýıh namazyna kelýshi jamaǵattyń qarasy kóp. Tegin taksı jobasy ásirese aqsaqaldarymyzǵa, qart analarǵa qyzmet etip, ol kisilerdi namazdan soń úıine jetkizip salatyn bolady», - deıdi Atyraý oblysynyń Bas ımamy Batyrjan Mansurov.