Atyraýdyń oblystyq drama teatry akademııalyq ataq aldy
ASTANA. QazAqparat - QR Úkimetiniń qaýlysyna sáıkes 80 jyldyq tarıxy bar oblystyq teatrǵa akademııalyq ataq berildi, dep xabarlaıdy QazAqparat Atyraý oblystyq Óńirlik kommýnıkatsııalar qyzmeti.
Ótken jyly oblys ákimdiginen drama teatrǵa akademııalyq ataq berý jóninde Mádenıet jáne sport mınıstrligine usynys tastalǵan bolatyn. Búginde sol usynys qaralyp, oń sheshimin tapty. Ónerge qoldaý, ekpin kelmeı damymaıtynyn alǵa tartqan teatr dırektory Berik Jamenov oblys basshylyǵyna rızashylyǵyn bildirdi.
«Sońǵy eki jyl ishinde teatr úlken belesterge jetti. Shetelge gastroldik saparlarǵa shyǵyp, birqatar shaqyrtýlar aldy. Ótken jyly 25-shi ret ótken respýblıkalyq teatr festıvalinde birinshi orynǵa ıe boldy. Osy eńbek elenip, búginde oblys ákiminiń tikeleı qoldaýymen akademııalyq ataq alyp otyrmyz. Bul bastamany Qazaqstan teatrlar qaýymdastyǵynyń prezıdenti Asanáli Áshimovtiń ózi qoldady. Osynyń barlyǵy teatr qyzmetkerleriniń eńbegi», - deıdi Berik Jamenov.
Aıta ketý kerek, oblystyq akademııalyq drama teatr kúzge taman óziniń 80 jyldyq mereıtoıyn atap ótedi. Teatr basshylyǵynyń málimdeýinshe, mereıtoı qarsańynda TMD jáne elimizdegi iri teatr ujymdarymen birlesip festıval jáne tanymal ártister qatysýymen sheberlik sabaqtaryn ótkizý josparlanýda.
