Atyraýdyń Mııaly aýylynda - karantın, Muqyrda - shekteý engizildi

ATYRAÝ. QazAqparat – Atyraý oblysynyń Qyzylqoǵa aýdanyndaǵy Mııaly aýylynda - karantın rejımi, al, Muqyr aýylynda - shekteý sharalary engizildi, dep habarlaıdy QazAqparat.

Qyzylqoǵa aýdanynyń bas memlekettik sanıtar dárigeri Altyngúl Aımuratovanyń qaýlysymen atalǵan aýyldardaǵy karantın men shekteý sharalary búgin, 10 maýsym saǵat 00:00-den 24 maýsym tańǵy saǵat 07:00-ge deıin sozylady.

«Karantın rejımi kezinde Mııaly aýylyna adamdar men avtokóliktiń kirip-shyǵýyna tyıym salynsyn. Mııaly aýylynyń turǵyndary ózge óńirlerden karantın jarııalanǵan ýaqyttan bastap 72 saǵat ishinde kelgen jaǵdaıda aýylǵa kirýge ruqsat etilsin» delingen qujatta.

Bul aýyldarda azyq-túlik bazarlary men dúkender, dárihanalar saǵat 9:00-21:00 aralyǵynda jumys isteıdi. Al, HQO men meshitter, azyq-túlik satpaıtyn saýda oryndary men dúkender, fotosalondar men lombardtar, tigin atelesi men túrli sheberhanalar sekildi ózge nysandar, taksı qyzmeti jumysyn toqtatty.

«Qazir aýdanda 9 adamnan qaýipti indettiń belgisi anyqtaldy. Onyń 8-i - Mııalynyń, bireýi - Muqyr aýylynyń turǵyny. Olarmen baılanysta bolǵandar anyqtalyp jatyr», - deıdi Qyzylqoǵa aýdanynyń bas memlekettik sanıtar dárigeri Altyngúl Aımuratova.

Eske sala ketelik, buǵan deıin Aqkól aýyly karantınge jabylǵan edi.