Atyraýdyń memlekettik kirister basqarmasy bastyǵynyń orynbasaryna 5,6 mln teńge aıyppul salyndy
ATYRAÝ. KAZINFORM - Sot Atyraý qalasy kirister basqarmasy bastyǵynyń orynbasary Aıgúl Yrzaǵulovaǵa para alǵany úshin 5,6 mln teńge aıyppul saldy, dep habarlaıdy QazAqparat.
«Sot Yrzaǵulovaǵa ózi alǵan paranyń 70 ese kóleminde aıyppul salyp, ony kináli dep tapty. Onyń qylmystyq jolmen tapqan dúnıe-múlki tárkilendi. Sonymen qatar sottalǵan azamat ómir boıyna memlekettik qyzmette jumys isteı almaıtyn boldy»,-dep habarlady oblystyq sottyń baspasóz qyzmeti.
Osyǵan deıin málim bolǵanyndaı, sybaılas jemqorlyqqa qarsy kúres ulttyq bıýrosynyń Atyraý oblysy boıynsha departamentiniń ókilderi birneshe márte para alǵany úshin Atyraý qalasynyń kirister basqarmasy bastyǵynyń orynbasary A.Yrzaǵulovany ustady.
Oǵan salyq esebin ótkizip, esepshotardy ashý, qosylǵan qun salyǵyn kedergisiz esepke qoıý úshin júıeli túrde birqatar kásipkerlerden qarjy jáne materıaldyq qundylyqtar túrinde syılyq alyp keldi degen aıyp taǵyldy. Ol óziniń kezekti parasyn - 130 myń teńgeni alý kezinde qolǵa tústi. Shenenýnik óziniń kinásin tolyq moıyndap, protsessýaldyq kelisim jasaý jóninde ótinish berdi.
