Atyraýdyń Isataı aýdanynda 36 jel elektr qondyrǵysy ornatyldy
ATYRAÝ. QazAqparat - Atyraýdyń Isataı aýdanynda 36 jel elektr qondyrǵysy ornatyldy, dep habarlaıdy QazAqparat tilshisi.
Atyraý oblystyq energetıka jáne turǵyn úı-kommýnaldyq sharýashylyq basqarmasynyń basshysy Murat Iǵalıevtiń aıtýynsha, aımaqta jańartylǵan energııa kózderin engizý josparlanyp otyr.
«Isataı aýdanyna 36 jel elektr qondyrǵysy ornatyldy. Qazir ony iske qosý, synaq jumystary júrgizilýde. Atalǵan nysan kelesi jyly paıdalanýǵa beriledi dep josparlanyp otyr»,- deıdi Murat Iǵalıev.
Atyraýda alǵash qolǵa alynǵan joba tabysty bolady degen senim bar. Onyń qýaty 53 MVt-ty quramaq. Qondyrǵy paıdalanýǵa berilgennen soń «Atyraý-Jaryq» AQ-nyń jelisine qosylady. Osylaısha, qosymsha qýat kózi tapshylyqty azaıtýǵa múmkindik beredi.
Murat Iǵalıevtiń pikirinshe, óńirdi jaryqtandyrýǵa qatysty ózge de jobalar jetkilikti. Sonyń deni memlekettik-jekemeshelik áriptestikti iske asyrý aıasynda qolǵa alynýda. Byltyrdan bastap beri Atyraý qalasynyń kóshelerinde jaryq jelisiniń qurylysyn salý jumystary júzege asyrylyp keledi. Búginde 39 kósheni jaryqtandyrý boıynsha qurylys-montaj aıaqtalǵan. Endi oblys ortalyǵynyń 189 kóshesine jaryq ornatý máselesi sheshilmek. Qaladan Inder jáne Dossor baǵytyndaǵy polıtsııa beketterine deıingi jol aralyǵy jaryqtandyrylady.
«Mundaı jobalar tıimdi. Jol boıyna energııa únemdeýshi, ozyq tehnologııamen jasalǵan shamdar qoldanylady. Bul túnde turǵyndardyń erkin júrip-turýyna jaǵdaı jasaıdy. Sondaı-aq, jol qaýipsizdigin qamtamasyz etedi», - deıdi Murat Iǵalıev.
