Atyraýdyń Inder aýdanynda kópqabatty 20 turǵyn úı salynady
ATYRAÝ. QazAqparat – Atyraýdyń Inder aýdanynda kópqabatty 20 turǵyn úı salynady, dep habarlaıdy QazAqparat.
Bul týraly turǵyndar aldynda onlaın formatta esep bergen Inder aýdanynyń ákimi Meıirim Qalaýı málim etti.
Aýdan ákiminiń aıtýynsha, Inderbor kentiniń ońtústik batys bóligindegi Kóktem shaǵyn aýdanynda 35 ga aýmaqta 20 kópqabatty turǵyn úı salý josparlanǵan. Sondaı-aq 4 áleýmettik nysan boı kótermek.
«Jańadan salynatyn turǵyn úılerde 1 292 páter bolady. Qazir 5 qabatty 80 páterlik bir turǵyn úıdiń, 4 qabatty 48 páterlik 4 turǵyn úıdiń qurylys jumystarymen qatar, ınjnerlik-kommýnıkatsııalyq ınfraqurylym jelisi júrgizilýde. Buǵan qosa besqabatty 80 páterlik 2 turǵyn úıdiń qurylysyn júrgizetin merdiger mekeme anyqtalyp, kelisimshart jasaldy», - deıdi Meıirim Qalaýı.
Onyń aıtýyna qaraǵanda, qazir Inder aýdanynda 13 jobanyń qurylysy júrgizilip jatyr. Sonyń ishinde «Kóktem» qazaq orta mektebiniń 80 oryndyq japsarjaıy men ınjenerlik jelisi, Inderbor kentindegi sport oıyn alańdary, Jarsýat aýylyndaǵy deneshynyqtyrý-saýyqtyrý kesheni, tórt qabatty 48 páterlik 4 turǵyn úıge deıingi sý jáne káriz jelisin salý bar.
Eske sala ketelik, budan buryn 150-ge jýyq atyraýlyq otbasy baspanaly bolǵan edi.
