Atyraýdyń Inder aýdanynda «Ashyq ákimdik» jumysyn bastady
QR Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń basshysy Q.Súleımenovtiń aıtýynsha, «Ashyq ákimdik» jobasy Memleket basshysy Qasym-Jomart Toqaev usynǵan «Halyq únine qulaq asatyn memleket» tujyrymdamasyn iske asyrý maqsatynda ashylǵan. Mundaı «Ashyq ákimdik» keńsesi ózge aýdandar men Atyraý qalasynda jumysyn bastaǵan edi. Endi Inder aýdanynda da jumys isteı bastady. Basty maqsat – turǵyndardyń ótinishine qulaq túrip, máseleleriniń tez sheshimin tabýyna yqpal etý. Sondaı-aq, sybaılas jemqorlyq áreketiniń aldyn alyp, jolyn kesýdi kózdelgen.
«Atalǵan joba – «open space» formatynda halyqqa qolaıly jaǵdaı qalyptastyrýdaǵy eń ońtaıly nusqa. Munda turǵyn úı kezegi, áleýmettik sala, jer máseleleri boıynsha arnaıy mamandar qyzmet kórsetedi. Óz-ózine qyzmet kórsetý buryshy da bar. «Ashyq ákimdik» keńsesinde 104 memlekettik qyzmettiń 34 túrin birden alýǵa bolady» - deıdi aýdan ákimi Meıirim Qalaýı.
Aýdan ákimdiginiń ǵımaratynda ashylǵan «Ashyq ákimdik» keńsesinde balalarǵa arnalǵan oıyn alańy qarastyrylǵan. Munda aýdan ákiminiń azamattardy jeke máselelermen qabyldaý kabıneti ornalasqan.
Eske sala ketelik, budan buryn Atyraýda «Ashyq ákimdik» front-ofısi ashylǵanyn habarlaǵan edik.
