Atyraýdyń eki turǵyny 477 myń teńgeniń múlkin urlaǵan
ATYRAÝ. QazAqparat – Atyraý qalasynda eki jigit 477 myń teńgeniń múlkin urlaǵan, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, qala turǵyny «Nursaıa» shaǵyn aýdanyndaǵy úılerdiń birine ury túskeni týraly habar bergen.
«Polıtsııa qyzmetkerleri turǵyn úıdiń esigin buzyp kirgen urylar 14 dana jylytý batareıasyn, 1 dana perforatory men 250 metrlik kabeldi qol etkenin anyqtady. Tártip saqshylary atalǵan urlyqqa qatysy bar eki kúdiktini vıdeokameranyń kómegimen bir kúnde ustady. Kúdiktiler – Atyraý qalasynyń 32 jáne 31 jastaǵy turǵyndary. Urylar jábirlenýshi azamatqa 477 myń teńge kóleminde materıaldyq zalal keltirgen» -dep habarlady departamenttiń baspasóz qyzmeti.
Qazir atalǵan urlyq deregimen ustalǵan kúdiktilerge qatysty QR Qylmystyq Kodeksiniń 188-baby 3 bóligimen sotqa deıingi tergeý júrgizilip jatyr.
Eske sala ketelik, budan buryn Atyraý oblysynda 9 iri qarany urlaǵan qylmystyq top ustalǵanyn jazǵan bolatynbyz.
