Atyraýdyń burynǵy ákimin Interpol izdestirýde

Bul týraly búgin Qarjy polıtsııasynda ótken baspasóz máslıhatynda vedomstvonyń resmı ókili Murat Jumanbaı málimdedi.

«Búginde Bergeı Rysqalıev pen onyń 10 sybaılasy izdestirilýde. Agenttik olardyń jasyrynǵan jerin anyqtaý boıynsha barlyq jedel-izdestirý jumystaryn júrgizip jatyr. Interpol halyqaralyq uıym bolǵandyqtan, ol da bul sharaǵa qatysatyn bolady», - dep atap ótti M. Jumanbaı.

Eske salsa keteıik, 2013 jylǵy 23 qańtarda Atyraý oblysynyń burynǵy ákimi Bergeı Rysqalıevke bıýdjet qarajatyn urlaý, qyzmettik ókilettigin teris paıdalaný boıynsha aıyp taǵylyp, sol kúni ol izdeýge jarııalandy. Aǵymdaǵy jylǵy 24 qańtarda Atyraý qalasynyń №2 sotynyń úkimimen oǵan qatysty syrttaı qamaýǵa alý týraly bultartpaý sharasy taǵaıyndaldy.