Atyraýdyń birneshe shaǵyn aýdanynda ystyq sý ýaqytsha toqtatylady
«Atyraý jylý jelileri» AQ búgin, 2 mamyrdan 5 mamyrǵa deıin munaıly shahardaǵy birneshe shaǵyn aýdannyń turǵyn úılerine ystyq sý berýdi ýaqytsha toqtatatýdy uıǵarǵan. Buǵan jylý pýnkterindegi jabdyqtardy tekserý sebep bolǵan.
«Kúrdeli jóndeý jumystarynyń josparly kestesine sáıkes jylý pýnkteriniń jabdyqtaryna tekserý júrgiziledi. Osyǵan baılanysty «Atyraý jylý júıeleri» AQ 2023 jylǵy 2-5 mamyr aralyǵynda ystyq sý berý ýaqytsha toqtatylatynyn habarlaıdy. Osy kezeńde «Vokzal mańy» 3 shaǵyn aýdanyndaǵy №12, 14, 15, 16, 17, 19, 20, 22, 23, «Almagúl» shaǵyn aýdanynyń № 27, 28, 29, 30, 31, 32, 33, T. Amandosov kóshesinde ornalasqan №42, 42/1, «Avangard-4» shaǵyn aýdanynyń №1, 2, 3, 4, 7, 17, 18, 19, Q. Satpaev kóshesindegi №3a, 4a, 5, 66 úılerde ystyq sý bolmaıtynyn qaperge beremiz», -delingen kásiporyn taratqan aqparatta.
Eske sala ketelik, budan buryn Atyraýda úsh kún qatarynan ystyq sý bolmaıtynyn habarlaǵan edik. Atyraý oblysynyń energetıka kesheni baspasóz qyzmeti 19-21 sáýir aralyǵynda tutynýshylarǵa ystyq sý berý toqtatylatynyn málim etken edi.
«Synaq júrgizý kezinde jazataıym oqıǵalardy boldyrmaý jylý trassasynyń qubyrlaryna 10 metrden kem qashyqtyqqa jaqyndamaý suralady. Qubyrlarda sý aǵý men jarylý baıqalsa, dereý habarlaýdy ótinemiz», -delingen edi habarlamada.
