Atyraýdyń birneshe shaǵyn aýdanyna elektr energııasy berildi

ATYRAÝ. QazAqparat – Atyraý qalasynyń birneshe shaǵyn aýdanyna elektr energııasy berildi. Biraq eki mekteptiń oqýshylary sabaqty onlaın formatta oqıdy, dep habarlaıdy QazAqparat.

Oblys ákiminiń baspasóz qyzmetinen málim etkendeı, Atyraý qalasyndaǵy Geolog, Juldyz, Tomarly, Birlik, Vokzalmańy shaǵyn aýdandarynda elektr qýaty qalpyna keltirildi.

«Qarashanyń 13-inen 14-ine qaraǵan túni Atyraý qalasyndaǵy Birlik shaǵyn aýdanynda ornalasqan №18 qosalqy elektr stantsııasynda órt boldy. Sonyń saldarynan munaıly shahardyń birneshe shaǵyn aýdany jaryqsyz qalyp, keıbir bilim berý mekemelerinde sabaq onlaın formatta ótken edi. Qazir elektr energııasyn jetkizetin jelidegi apat saldary joıyldy. Oblys ákimi Serik Shápkenov elektr energııasymen qamtamasyz etý máselesin jeke baqylaýynda ustap otyr», -dep habarlady oblys ákiminiń baspasóz qyzmeti.

Atyraý qalalyq bilim bóliminiń málimetinshe, 15 qarashada Birlik shaǵyn aýdanynda ornalasqan №35 balabaqsha balaqaılardy qabyldamaıdy. Sondaı-aq, B.Nysanbaev atyndaǵy jáne Geolog eldi mekenindegi №36 orta mektep 15 qarashada sabaqty onlaın formatta oqıdy. Búgin túske deıin elektr jaryǵy qosylsa, atalǵan bilim ordalarynyń ekinshi aýysymdaǵy oqýshylary sabaqty shtattyq rejımde oqýdy jalǵastyrady.

Eske sala ketelik, budan buryn Atyraýda elektr energııasynyń óshýinen mektepter onlaın oqýǵa kóshirilgenin, Atyraý jaryqsyz qalyp, tótenshe jaǵdaı sebebi atalǵanyn habarlaǵan bolatynbyz.

Keıin Atyraýda qosalqy stansadaǵy órttiń kesirinen 8 myń abonent jaryqsyz qalǵany belgili bolǵan edi.