Atyraýdyń bir mektebi onlaınǵa kóship, taǵy biri senbide oqıtyn boldy

ATYRAÝ. QazAqparat – Atyraý qalasyndaǵy bir mektepte seısenbiniń sabaǵy onlaın formatqa kóshirildi. Al ekinshi bilim ordasyndaǵy sabaq senbige aýystyryldy, dep habarlaıdy QazAqparat tilshisi.

«Atyraý oblysy Sý Arnasy» kommýnaldyq memlekettik kásipornynyń baspasóz qyzmetiniń málimetinshe, 12 qyrkúıekte munaıly shahardyń keıbir bóligine sýyq sý ýaqytsha berilmeıdi.

«Atyraý qalasynyń Qurmanǵazy kóshesindegi Dárihana basqarmasynyń ǵımaratynan «Toqash» dúkeniniń mańaıyndaǵy K.Mádenov kóshesine deıingi aýmaqta dıametri 600 mm qubyr japqyshyn aýystyrý jumysy júrgiziledi. Osyǵan baılanysty 12 qyrkúıekte jergilikti ýaqytpen saǵat 10:00-den 18:00-ge deıin keıbir mekenjaılarǵa sýyq sý berý ýaqytsha toqtatylady», - dep málim etti kásiporynnan.

Osyǵan baılanysty «Leshoz», «Nursaıa» jáne «Samal» shaǵyn aýdandaryndaǵy 15 turǵyn úı kesheni men jeke ıeliktegi úılerdiń turǵyndary salqyn sýsyz otyrady. Sońdaı-aq birneshe keńse men «Saraıshyq» kommýnaldyq bazaryna, 3 mektep pen 2 balabaqshaǵa, 1 kolledjge sý berilmeıtini belgili bolyp otyr.

Nazarbaev Zııatkerlik mektebi men ál-Farabı atyndaǵy bilim ordasynyń ákimshiligi birinshi aýysymdaǵy sabaqtyń onlaın fortmatqa kóshirilgenin habarlady.

«Tehnıkalyq sebepke baılanysty sý bolmaıdy. Sol sebepten, mektebimizdiń birinshi aýysymy onlaın formatta oqıdy degen sheshim qabyldandy. Al ekinshi aýysym boıynsha sheshim tańerteńgi jaǵdaıǵa baılanysty qabyldanady», - delingen ál-Farabı atyndaǵy mekteptiń ákimshiligi taratqan aqparatta.

Al Nazarbaev Zııatkerlik mektebinde seısenbide sabaq ótkizbeýge sheshim qabyldanǵan. Bul kúngi sabaq senbige aýystyryldy.